Фарғона, Бухоро ва Хоразмда яна 24 киши коронавирусдан тузалди. Ўзбекистонда тузалганлар сони 293 нафарга етди

Фарғона вилояти юқумли касалликлар шифохонасида коронавирусга чалинган 5 нафар бемор соғайди. Улар 21 апрель, сешанба куни, вилоят соғлиқни сақлаш бошқармаси масъуллари иштирокида реабилитацияга кузатилди. Бу ҳақда Соғлиқни сақлаш вазирлиги хабар берди.

Маълум қилинишича, соғайганларнинг барчаси Туркиядан келган. Коронавирус инфекцияси тасдиқлангач, улар вилоят юқумли касалликлар шифохонасига жойлаштирилган. Уларнинг 2 нафари Тошкент шаҳридан, шунингдек, тузалганлар қаторидан Қашқадарё, Тошкент ва Андижон вилоятларида яшовчи 1 нафардан фуқаро ўрин олган. Беморларнинг 3 нафари эркак, 2 нафари аёл бўлиб, улар орасида энг каттаси 41 ёшда, энг кичиги 20 ёшда.

Фарғона вилояти бўйича шу пайтга қадар коронавирусдан тузалганлар сони 11 нафарга етди.

Шунингдек, 21 апрель куни Бухоро вилоятида яна 15 нафар, Хоразм вилоятида эса 4 нафар коронавирус билан оғриган бемор буткул соғайиб, реабилитацияга кузатилди.

Бухорода шифо топганларнинг 7 нафари Россиядан, 4 нафари эса Туркиядан чартер рейслар орқали вилоятга олиб келинган ва карантинга олинган. Уларда коронавирус инфекцияси тасдиқлангач, вилоят юқумли касалликлар шифохонасига жойлаштирилган. Тузалганлардан 11 нафари эркак, 4 нафари эса аёл. Беморларнинг 6 нафари Тошкент шаҳридан, 3 нафари Бухоро ва 2 нафари Сурхондарё вилоятидан. Қорақалпоғистон Республикаси, Самарқанд, Андижон ва Сирдарё вилоятларидан бўлган 1 нафардан бемор ҳам тузалган. Улар орасида энг каттаси 54 ёшда бўлса, энг кичиги 16 ёшда.

Шу тариқа, Бухоро вилоятида коронавирусдан тузалганлар сони 83 нафарга етди.

Хоразм вилоятида тузалганларнинг барчаси Россиядан чартер рейс билан келган. Коронавирус инфекцияси тасдиқлангач, улар вилоят юқумли касалликлар шифохонасига жойлаштирилган. Уларнинг 3 нафари аёл, 1 нафари эркак бўлиб, 2 нафари Бухоро вилоятидан, Самарқанд ва Андижон вилоятларидан бўлган 1 нафардан фуқаро ҳам соғайган. Улар орасида энг каттаси 45 ёшда бўлса, энг кичиги 27 ёшда.

Хоразм вилоятида айни пайтга қадар 10 нафар бемор коронавирусдан буткул соғайди. Ўзбекистонда коронавирус инфекциясидан соғайган беморларнинг умумий сони 293 нафарга етди.

Аввалроқ Ўзбекистонда коронавирусдан тузалганлар сони 269 нафарга етгани ҳақида хабар берилган эди. Бундан ташқари, Ўзбекистонда коронавирусдан яна бир киши вафот этди, қурбонлар сони 6 нафарга етди.

Ўзбекистонда 21 апрель соат 10:00 ҳолатига кўра, коронавирус инфекциясини юқтириб олганлар сони 1657 нафарни ташкил этмоқда. Хорижда 73 ўзбекистонликда коронавирус аниқланган (энг кўпи — 42 нафари — Россияда), уларнинг тўрт нафари вафот этган.