Тановул қилинган таом ва маҳсулотлар саломатликка таъсири катта экани ҳақида гапиралавериб, сийқаси чиқиб кетган. Аммо овқат ҳазм бўлиши, тери ранги ва қон айланиши сингари кўриш қобилиятига ҳам таъсир кўрсатувчи маҳсулотлар мавжуд. Қуйида ана шундай маҳсулотлар ҳақида маълумотлар келтирилади.
Сабзавот ва кўкатлар
Фото: WebMD
Сабзи кўриш қобилиятини яхшиловчи маҳсулотлар рўйхатида биринчилардан ҳисобланади. Ушбу сабзавот таркибида А витамини бор бўлиб, айнан ушбу витамин кўриш фаолиятини яхшилайди. Шунингдек, антиоксидантлар, C, B ва E витаминлари, калий, калций, натрий, фосфор, темир ва фтор каби микроэлементларни, қолаверса, ёш ўтиб юзага келадиган кўришнинг ёмонлашишига қарши тўсиқ бўладиган бета-каротинни ҳам ўз ичига олади. Сабзини бутунлигича, хоҳласангиз олма билан шарбат қилиб, 1-2 қошиқ лавлаги сувини қўшиб ичишингиз ёки салат қилиб истеъмол қилишингиз мумкин.
Рационингизга қовоқни ҳам қўшинг, унинг таркибидаги каротин кўриш учун фойдали. Қовоқдан бўтқа, овқат тайёрланг, печ ёки қасқонда зираворлар сепиб димланг.
Кўкатлардан исмалоқ катарактага қарши самарали ҳисобланади. Унинг таркибида фосфор, мис, рух, оқсил ҳамда ёғ кислоталари мавжуд. Иложи бўлса, кўкатлардан шарбат ичишга ҳаракат қилинг ёки сабзили шарбатга қўшинг.
Мева ва резаворлар
Фото: Getty Images
Черниканинг кўриш қобилиятини яхшилашда фойдаси катта. Унинг таркибида антиоксидант, фойдали кислота ва А, C, B витаминлари бор. Резаворларда кўришни яхшилайдиган лютеин бор. Йогуртга резаворларни қўшиб ейиш тавсия қилинади. Мевалардан ўрик, апельсин, киви ва қулупнайнинг кўзга фойдаси кўп. Бундан ташқари, кўриш қобилиятининг яхшиланиши учун наъматак ва қовуннинг ҳам аҳамияти катта.
Балиқ
Фото: The Health Lab
Кўриш қобилияти яхши бўлмаганлар учун балиқ ейиш тавсия қилинади. Шунинг учун рационингизга зудлик билан балиқ маҳсулоти ва балиқ ёғини қўшинг.
Гўшт, тухум, сут маҳсулотлари
Фото: Getty Images
Тухум, мол гўшти ва сут маҳсулотлари истеъмол қилишни канда қилманг. Улар таркибидаги витамин ва моддалар жуда фойдалидир. Ушбу маҳсулотлардан тўйимли таомлар тайёрлаб соғлиғингиз, хусусан, кўриш қобилиятингизни табиий йўл билан яхшиланг.
