Барча аёллар ёш ва гўзал кўринишни истайди, лекин баъзида гўзаллик сири истеъмол қилинадиган маҳсулотлар билан боғлиқлигини унутиб қўяди. Саломатлигига бефарқ бўлмаганлар учун Good house нашри терининг соғлом ва таранг кўринишига ёрдам берувчи маҳсулотлар ҳақида маълумот беради.
Тухум
Тухумнинг соч ва тери учун фойдаси катта. Унда соч, тирноқ ва тери саломатлиги учун зарур бўлган витаминлар, терининг эластиклигини таъминловчи аминокислоталар мавжуд. Тухумни куннинг биринчи қисмида нонушта вақтида ейиш тавсия қилинади. Ундан тайёрланган омлет ҳам мазали, ҳам фойдали бўлади.
Кўкатлар
Кўкатлар таомномадан ўрин олиши шарт ҳисобланади. Чунки ушбу маҳсулот нафақат тери, балки бошқа органлар ва саломатлик учун ҳам аҳамиятли. Кўкатлар истеъмол қилган инсон ёш ва тетик кўринади, тери ранги тиниқ ва соғломлиги билан эътиборни тортади. Айниқса, баҳор мавсумидаги витамин етишмовчилигида кўкатлардан салат ва таомлар тайёрлашни канда қилмаслик керак. Балиқ, гўшт маҳсулотлари билан қўшиб ейиш ёки кўк сомса тайёрлаш тавсия қилинади.
Чиа уруғи
Марказий ва Жанубий Америкада етиштириладиган чиа уруғининг 2 қошиғида 5000 мг Омега 3 ёғ кислоталари мавжуд бўлади. Ушбу кислоталар теридан намлик чиқиб кетмаслигини назорат қилади ҳамда меланома, яъни асосан терида пайдо бўладиган турли ўсмаларга қарши профилактик восита ҳисобланади. Мазкур фойдали ўсимлик уруғини турли бўтқалар, хусусан, сули ёрмаси ёки смузига қўшиб ейиш мумкин.
Бодом
Бодомда E витаминининг 50% кундалик нормаси мавжуд бўлиб, ўзида антиоксидантларни мужассам этгани билан ҳам аҳамиятли саналади. Шунингдек, бодом таркибидаги моддалар тери намлигини сақлайди ва ажин тушишининг олдини олади. Бодомни мева ёки творогга, ё бўлмаса пишириқларга қўшиб ейишингиз мумкин.
Асал
Асал ширин бўлгани билан шакар сингари қонда глюкоза кўпайишига сабабчи бўлмайди. Унинг таркибида марганец ва селен минераллари мавжуд. Асал терини ёш ва тетик кўрсатиш хусусиятига эга. Уни нафақат истеъмол қилиш, балки юз учун лимон ва сут билан бирга қўшиб ниқоб сифатида фойдаланиш ҳам мумкин.
Тарвуз
Тарвуз терини ички томондан намлантириш, уни силлиқ ва жилоли кўрсатиш хусусиятига эга. Тарвуз нафақат тери гўзаллиги, балки ҳазм жараёни учун ҳам фойдали ҳисобланади. Уни тўртбурчак шаклда кесиб, бошқа мевалар билан қўшиб салат қилиб ейиш тавсия қилинади.
Изоҳ (0)