Ўзбекистонда карантин даврида «ўзини яккалаш» тартибига ўтган фуқароларнинг уйда ўтирганидан, шунингдек, одамларда коронавирус пандемияси сабаб хавотир кучли эканидан фойдаланиб қолаётган фирибгарлар турли усулларда кишиларни чалғитиб, уларнинг электрон ҳисобдаги маблағларини ўзлаштиришга ҳаракат қилмоқда. Бу ҳақда Ўзбекистон Ахборотлаштириш ва телекоммуникациялар соҳасида назорат бўйича давлат инспекцияси «Ўзкомназорат» хабар берди.
Маълум қилинишича, фуқароларга муайян сана ёки геожойлашув нуқтаси координатларини кўрсатиб, «Сиз карантин қоидасини буздингиз, энди Маъмурий жавобгарлик тўғрисидаги кодекснинг 54-моддасига мувофиқ базавий ҳисоблаш миқдорининг беш бараваригача миқдорда жарима тўлайсиз», деган мазмунда SMS хабарлар жўнатиш ҳолатлари учрамоқда. Шунингдек, мазкур хабарларда жаримани уйдан тўлаш ҳам мумкинлигини таъкидланиб, тўлов учун карта рақами кўрсатилмоқда.
«Ўзкомназорат» давлат инспекцияси фуқароларни бу каби ёлғон хабарларга алданмасликка, SMS хабарлар, телефон қўнғироқларини қабул қилганда ҳеч қачон электрон ҳисобдаги маблағлар ёхуд турли махфий кодлар ҳақида бегона шахсларга маълумот бермасликка чақирган. Шунингдек, бу каби ҳолатлар кузатилганда SMS хабарномани ўчириб ташлаш, телефон қўнғироғи бўлганлиги ҳақида 102 рақами орқали ҳуқуқ-тартибот идораларига хабар бериш тавсия этилади.
Аввалроқ «Ўзкомназорат» коронавирус сабабли интернет тармоғида фирибгарликлар кўпаяётгани ҳақида огоҳлантирган эди.
Изоҳ (0)