Ўзбекистон мусулмонлари идораси Фатво ҳайъатининг 2020 йилги закот миқдори бўйича қарори эълон қилинди.
Қарорда айтилишича, одатда, нисоб миқдори ҳар йили Ўзбекистон Мусулмонлари идораси Фатво ҳайъати томонидан Рамазон ойида эълон қилинар эди. Лекин бугунги кунда бутун дунё бўйлаб, жумладан, Ўзбекистонда ҳам коронавирус пандимеяси тарқалишининг олдини олиш мақсадида мамлакатда карантин эълон қилиниши сабабли заруратсиз уйдан ташқарига чиқиш мумкин бўлмай қолди.
«Табиийки, бундай пайтда аҳолининг моддий ёрдамга муҳтож бўлган қисмини қўллаб-қувватлашнинг зарурати туғилди ва айни пайтда бу ажр-савоби кўп бўлган амалдир. Мана шундай вазиятда моли нисобга етган бой-бадавлат кишилар молларининг закотини ҳам ҳақдорларга беришлари айни савобли амаллар сирасига киради», — дейилади қарорда.
Ана шуларни инобатга олган ҳолда Ўзбекистон Мусулмонлари идораси Фатво ҳайъати закот нисобини Шаъбон ойида чиқаришга қарор қилди.
Фатво ҳайъати 1 грамм тилланинг бугунги кундаги ўртача нархи 250 000 (икки юз эллик минг) сўм эканини эътиборга олиб, милодий 2020 йил (ҳижрий 1441 йил) учун закот нисобини (85 грамм тилладан) 21 250 000 (йигирма бир миллион икки юз эллик минг) сўм деб белгилади. Мазкур қийматнинг қирқдан бири (1/40), яъни закот учун чиқариладиган қисми 531 250 (беш юз ўттиз бир минг икки юз эллик) сўмга тенг бўлади.
«Шунга кўра, зарурий эҳтиёжидан ташқари бир йил давомида 21 250 000 (йигирма бир миллион икки юз эллик минг) сўмдан ортиқ маблағга эга бўлган мусулмон киши жами маблағининг қирқдан бирини закот сифатида камбағал ва фақирларга бериши фарздир», — дейилади қарорда.
Аввалроқ Ўзбекистон Мусулмонлари идорасининг Рамазон ойини ўтказиш ҳақидаги баёнотида таровеҳ намозларини уйда ўқиш тавсия қилинганди.
Изоҳ (0)