Ўзбекистоннинг бир қатор банклари АҚШ долларни 10 минг сўмдан юқори қийматда сотиш ва сотиб олишни бошлади. Уларнинг аксарияти долларни 10 050 сўмдан сотиб олиб, 10 150 сўмдан сотмоқда.
Хусусан, ушбу курс Миллий банк, «Асакабанк», Orient Finance Bank, «Ипак йўли», «Равнақ-банк», Hi-Tech Bank, «Алоқабанк», «Ипотекабанк» томонидан ўрнатилган.
Infinbank эса долларни 10 140 сўмдан сотиб олиб, 10 150 сўмдан сотмоқда. «Капиталбанк»нинг Apelsin иловасида доллар 10 150 сўмдан таклиф қилинмоқда, 10 070 сўмдан сотиб олинмоқда.
14 апрель куни, куннинг биринчи ярмида деярли барча банклар долларни 9850 сўмдан сотишни бошлаган эди. Шундай қилиб, банкларда АҚШ валютаси курси ўртача 300—350 сўмга ўсди.
Қайд этиш жоиз, Марказий банк томонидан 14 апрелдан ўрнатилган долларнинг расмий курси 9693 сўмни ташкил этмоқда. Республика Валюта биржасида 14 апрель куни бўлиб ўтган савдолар чоғида доллар курси 9793 сўмгача кўтарилган эди.
Аввалроқ апрель ойи бошидан сўмнинг кескин қадрсизлангани муносабати билан Марказий банк баёнот бериб, бунга экспорт тушумлари ва пул ўтказмалари ҳажми қисқаргани, шунингдек, Россия рубли ва Қозоғистон тенгеси қадрсизланганини сабаб қилиб кўрсатган эди.
Айни вақтда Марказий банк сўм алмашув курсининг қадрсизланиши эҳтимолини паст даражада баҳолашини билдирган эди. МБнинг дастлабки прогнозларга кўра, қисқа муддатли даврда сўм алмашув курси маълум бир кичик ўзгаришлардан кейин ўзининг фундаментал трендига яқин даражада шаклланади.
Изоҳ (0)