14 апрель, сешанба куни, АОКА штабида Бош давлат санитария инспектори Нурмат Отабеков иштирокида бўлиб ўтган брифингда муҳим савол ва мурожаатлар юзасидан тегишли изоҳ ва жавоблар берилди.
Жумладан, Бош давлат санитария инспектори карантин вазиятида стоматология хизматларидан фойдаланиш масаласи, тиши оғриган беморларнинг уйдан чиқа олмаслиги, тиббиёт муассасасига боришида юзага келаётган тўсиқлар бўйича берилган саволга жавоб қайтарди.
«Бундай вазиятларда тез тиббий ёрдам хизматига қўнғироқ қилишингиз мумкин», — деди Отабеков.
Шунингдек, брифингда шошилинч тиббий вазиятларда шаҳарда шахсий автомобилда қандай ҳаракатланиш мумкинлиги борасида берилган саволга ҳам расмий изоҳ берилди. «Бир оиланинг чақалоғида парапроктит касаллиги бор ва у СамПИ касалхонасига ётиши зарур. Улар минг хавотирда ўз машинасида бормоқчи. Ҳар бир тўхтатган постга чақалоқ ярасини кўрсатиши керакми?» дея берилган саволга парапроктит Махсус комиссия қарорига кўра рухсат берилган вазиятлар рўйхатига киритилмагани ва оила тез тиббий ёрдам хизматини чақириши мумкинлиги ҳақида жавоб берилди.
Нурмат Отабеков «Оилабоши шифокорни уйидан олиб келиб, операциядан сўнг яна уйига олиб бориб қўйиши керак. Бундай вазиятда нима қилиш мумкин?», — дея йўлланган саволга қуйидагича жавоб қайтарди:
«Шифокорни олиб келиш ва олиб бориб қўйиш тақиқланади. Сиз ҳудудий поликлиникага қўнғироқ қилишингиз зарур ва улар шифокор келиб-кетишини ташкиллаштиришади».
Брифингда кесарча кесиш йўли билан туғиши керак бўлган ҳомиладор аёлни туғруқхонага етказишда тез тиббий ёрдам машинасини чақириши ёки шошилинч вазиятда шахсий автотранспортдан фойдаланиш мумкинлиги айтилди. Ушбу ҳаракатнинг қонунийлигига Республика махсус комиссиясининг қарорида келтирилган шошилинч тиббий ёрдам кўрсатиш билан боғлиқ вазиятларда шахсий автомобилдан фойдаланиш мумкинлиги тўғрисидаги банд асос бўлади.
Мавзуга доир:
Изоҳ (0)