Муддатли ҳарбий хизматга фуқароларни юбориш тадбирлари кечиктирилган бўлса-да, саралашдан ўтиб, «команда»га тушган чақирилувчилар кўнгилли равишда дезинфекция ишларида қатнашди. Бу ҳақда ҳарбий журналист Ғайрат Мадраҳимов «Дарё»га маълум қилди.
Марказий ҳарбий округига қарашли Самарқанд (775), Навоий (580) ҳамда Жиззах гарнизонида (302) жами 1657 нафар бўлажак аскар вилоятларнинг мудофаа ишлари бўйича бошқарма ва бўлимлари масъуллари ҳамда санитария-эпидемиология назорат марказлари билан ҳамкорликдаги тактик-махсус ўқув машғулотларида иштирок этди.
Шунингдек, ҳарбий округ кесимидаги куч тузилмаларнинг 30 га яқин махсус техникалари йўллар, кўпқаватли бинолар атрофи, кўчаларда тозалаш тадбирларига жалб қилинган.
Чақирилувчилар уйда қолишдан кўра COVID-19 инфекциясига қарши курашишни афзал билмоқда. Ҳар бир туманда ёшлардан иборат 4-5 тадан, вилоятларда эса 40 га яқин отрядлар тузилиб, бозорлар, маиший савдо дўконлари ҳамда аҳоли яшаш манзилларига юборилди.
Бундан ташқари ҳарбий техникаларга ўрнатилган овоз кучайтиргичлар орқали фуқаролардан заруратсиз кўчага чиқмаслик сўралмоқда.
Эслатиб ўтамиз, Марказий ҳарбий округда фуқароларни муддатли ҳарбий хизматга юбориш ва аскарларни хизматдан кутиб олиш тадбирлари 20 мартдан 10 апрель кунига қадар ўтказилиши кўзда тутилган эди. Бироқ Ўзбекистонда карантин тадбирлари сабабли фуқароларни муддатли ҳарбий хизматга юбориш вақтинча кечиктирилган.
Изоҳ (0)