«Барселона» собиқ ярим ҳимоячиси, ҳозирда Қатарнинг «Ас-Садд» жамоаси бош мураббийи Хави Эрнандес каталон клубининг Чемпионлар Лигасидаги натижалари ҳақида фикр билдирди.
«Чемпионлар Лигасида «Барселона»га фаворит сифатида қараш қийин. Жамоа қолганлардан анча кучли бўлган вақтдагина мусобақа ғолиблигини қўлга киритган ва айрим жамоаларга кулиб боққан тарихий омадга суяна олмайди. Ҳа, мен «Реал»ни назарда тутяпман. Бунақаси бошқа жамоаларда ҳам бўлган.
«Барселона»нинг 2009 йилги мусобақада «Челси»га қарши (ярим финал) ўйинда омади кулиб қолган. Ўшанда жамоа камчилик қолган ва дарвоза томон деярли зарба берилмаган вақтда Иньеста гол уриб, финал эшикларини очганди. Бу омад эди.
Мен Примерада ёмон натижа қайд этиб, тўрт, беш ёки олтинчи ўринни олган ҳолда, ўша мавсум Чемпионлар Лигасида ғолиб чиқишни назарда тутяпман. «Барселона» билан бунақаси бўлмаган, «Реал»да эса бўлган. Айнан шунинг учун омад ҳақида гапиряпман.
«Барселона» устунликка эга бўлиши ва ўз кучига ишончни ҳис қилиши керак. Жамоа ўз рақибларидан сезиларли даражада кучли бўлган тақдирда ғалаба қозонади, буни тарих кўрсатиб турибди», — дейди Хави.
«Реал» 2016—2018 йиллар оралиғида уч бор Чемпионлар Лигасини қўлга киритди ва бу натижани қайд этган мусобақа тарихидаги илк жамоага айланди. Бу вақт ичида мадридликлар фақат бир бор Испания Ла Лигаси чемпиони бўлган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)