Бандлик ва меҳнат муносабатлари вазирлиги матбуот котиби Шаҳноза Равшанова АОКА қошидаги штабда ташкил қилинган брифингда аҳоли бандлигига кўмаклашиш марказлари орқали томорқадан фойдаланиш учун субсидиялар олиш мумкинлигини айтиб ўтди.
«Дастлаб Аҳоли бандлигига кўмаклашиш маркази томонидан фуқаронинг бандлиги ва томорқа ер майдони ўрганиб чиқилади. Сўнг унга енгил конструкцияли иссиқхоналар ўрнатиш, кўчат ва уруғлик ёки суғориш воситалари харид қилиши учун ‘Томорқа хизмати’ МЧЖ, Аҳоли бандликка кўмаклашиш маркази ва томорқа ер эгаси томонидан 3 томонлама шартнома тузилади», — деган вазирлик матбуот котиби.
Шаҳноза Равшанова мана шу асосда фуқарога базавий ҳисоблаш миқдорининг 3 бараваридан 10 бараваригача бўлган миқдорда субсидия ажратилишини таъкидлаган.
«Субсидия — бу беғараз ёрдам ва уни қайтариш талаб этилмайди. Бундай турдаги субсидияларни фуқаролар фақат иссиқхона қуриш учун эмас, балки уруғлик, кўчат сотиб олиш учун ҳам ишлатиши мумкин. Апрель ойининг ўзида ишсиз ва банд бўлмаган фуқароларга енгил конструкцияли иссиқхоналар ўрнатиш, уруғлик ва кўчатлар харид қилиш учун 20 минг шахсий томорқа учун 35,4 миллиард сўм миқдорида субсидия ажратилади», — деган Шаҳноза Равшанова.
Меҳнат вазирлиги вакили агар субсидия олишда муаммолар бўлса, вазирликнинг (+71) 200-06-00 рақамига мурожаат қилиш лозимлигини ҳам эслатган.
Мавзуга доир:
- Ўзбекистонда томорқадан самарали фойдаланмаётган хонадон эгалари огоҳлантирилади, экин экмаганлар ер солиғини кўпроқ тўлайди
- Шавкат Мирзиёев банкларнинг ҳали бошланмаган узоқ муддатли лойиҳаларини 2020 йилнинг ўзида самара берадиганларига алмаштириш ҳақида кўрсатма берди
- Шавкат Мирзиёев иш ҳақини тўлаш учун корхоналарга кредитлар ажратиш зарурлигини таъкидлади
Изоҳ (0)