Ўзбекистон Беларусга коронавирусга қарши курашда фойдаланиш учун инсонпарварлик ёрдамини жўнатди

Ўзбекистон ҳукумати Беларусь Республикасига инсонпарварлик ёрдами юборди. Бу ҳақда Ташқи ишлар вазирлигининг «Дунё» ахборот агентлиги хабар берди.

Ушбу ёрдам Беларусь халқига коронавирус пандемиясига қарши курашда ёрдам беради, дейилади агентлик хабарида.

Ўзбекистон Фавқулодда вазиятлар вазирлиги томонидан ташкил этилган юкларга тиббий ниқоблар ва қўлқоплар, ҳимоя комбинезонлари, антисептиклар ва коронавирус билан курашда фойдаланиладиган бошқа зарур тиббий буюмлар киритилган.

Дўстона ёрдам Минскка Ўзбекистон Мудофаа вазирлигининг самолётида етказилади.

Аввал Хитойдан юборилган навбатдаги инсонпарварлик ёрдамининг Тошкентга олиб келингани, ХХРдан юборилган буюмлар орасида футболчи Одил Аҳмедов ва тадбиркор Гулбаҳор Тожимирзаеванинг тиббий буюмлар кўринишидаги хайрия юклари ҳам борлиги, шунингдек, мураббий Самвел Бабаяннинг ҳам ижтимоий ёрдам сифатида Ўзбекистонга тиббиёт буюмлари юборгани ҳақида хабар берилганди.