Бугун 12 апрель – Халқаро авиация ва космонавтика куни. Ушбу кун муносабати билан сизга карантин пайтида уйда қолиб, томоша қилишингиз мумкин бўлган коинот ҳақидаги энг сара фильмлар рўйхатини тақдим қиламиз.
«Interstellar»/ Interstellar
АҚШ, Буюк Британия, 2014 йил.
Илмий-фантастик драма.
Давомийлиги: 169 дақиқа.
IMDb рейтинги: 8,6.
Фильмдаги воқеалар номаълум келажакда ривожланади. Қурғоқчилик ва чанг бўронлари келтириб чиқарган глобал очарчилик ерга хавф солади. Юлдузлараро саёҳат инсониятнинг ягона умидига айланади. NASA ходимлари Сатурн сайёраси орбитасида истиқболли юлдуз тизимига олиб борадиган қора туйнукни топгач, тажрибали тадқиқотчилар гуруҳи инсон учун мос бўлган шароитларга эга сайёрани қидиришга киришади. Кристофер Ноланнинг ушбу машҳур фильми яратилиш жараёнида америкалик физик ва астроном Кип Торн маслаҳатчи сифатида иштирок этган.
«Гравитация»/ Gravity
АҚШ, Буюк Британия, 2013 йил.
Илмий-фантастик драма, триллер.
Давомийлиги: 91 дақиқа.
IMDb рейтинги: 7,7.
Фильм коинотдаги фожиа натижасида барча жамоа аъзоларидан айрилган тадқиқотчи Райан Стоун ҳақида ҳикоя қилади. Ер билан алоқа буткул йўқолгач, унинг уйга қайтиш ҳақидаги умиди ҳам сўнади.
Режиссёр Альфонсо Куарон ва оператор Эммануэль Любецки томонидан тақдим этилган картина дунё киноихлосмандлари томонидан катта қизиқиш билан қарши олинган фильмлардан саналади.
«Марслик»/ The Martian
АҚШ, 2015 йил.
Илмий-фантастик, саргузашт фильм.
Давомийлиги: 142 дақиқа.
IMDb рейтинги: 8,0.
«Арес III» тадқиқот кемаси қум бўрони сабаб Марсни тарк этади. Бироқ экспедиция аъзоларидан бири Марк Уотнинг ер билан алоқаси узилиб, битта ўзи қолиб кетади. Ўта қийин шароитда яшаб қолиш учун астронавт ирода кучини намойиш этиши талаб қилинади.
Коинотда яшаб қолиш мавзусидаги бошқа фильмлардан фарқли равишда, режиссёр Ридли Скоттнинг Энди Уирнинг шу номдаги китоби асосида суратга олган фильми жуда ижобий ва оптимистик руҳдалиги билан ажралиб туради.
«Жаҳаннам олови»/ Sunshine
Буюк Британия, 2007 йил.
Илмий-фантастика, драма, триллер, саргузашт.
Давомийлиги: 107 дақиқа.
IMDb рейтинги: 7,3.
Дэнни Бойлнинг илмий-фантастик фильми «Икар-II» коинот кемаси экипажининг аъзолари сўниб бораётган қуёшни аланга олдириш орқали инсониятни сақлаб қолиш учун йўл олиши ҳақида ҳикоя қилади. Бу биринчи миссия эмас эди. Жамоа бундан аввал худди шундай топшириқ билан кетиб 7 йил аввал изсиз ғойиб бўлган «Икар-I» ҳақида ҳам хабардор.
Фильм атиги 3 ой ичида суратга олинган бўлса-да, унга улкан вақт ва куч сарф қилинган. Сценарий ҳамда умумий тайёргарликнинг ўзига 2 йил кетган. Монтаж ишлари, визуал эффектлар ишланмаси 1 йил давомида олиб борилган. Режиссёр кейинчалик бошқа бу жанрда мураккаб картина ишламаслигини билдирган.
«Аполлон-13»/Apollo 13
АҚШ, 1995 йил
Саргузашт, тарихий фильм, драма.
Давомийлиги: 140 дақиқа
IMDb рейтинги: 7,6.
Рон Ҳоварднинг тарихий драмаси 1970 йилда амалга оширилган «Аполлон-13» миссияси давомидаги реал воқеликларга асосланган. Парвознинг илк 2 куни ҳеч қандай ғайриоддий ҳодисаларсиз ўтади. Бироқ кейин бортда кислород баллони портлаши ортидан жиддий авария юзага келади. Ушбу ҳодиса нафақат ойга қўниш, балки жамоанинг ерга эсон-омон етиб олиш масаласини ҳам сўроқ остида қолдиради.
«Аполлон-13» фильмида ишлатилган «Ҳьюстон, бизда муаммо бор» ибораси бир неча йиллардан бери оммавий ва машҳур саналади. Фильм инсоният томонидан коинотнинг забт этилиши машаққатлари ҳақидаги тўлиқ ва жуда қизиқарли картина ҳисобланади.
«Ой 2112»/ Moon
Буюк Британия, 2009 йил.
Илмий-фантастика, драма.
Давомийлиги: 97 дақиқа.
IMDb рейтинги: 7,9.
Коинот диспетчери Сэм мана 3 йилдирки Ойда ёлғиз ишлайди. У нодир газ олинишини назорат қилган ҳолда фақатгина гапирадиган робот билан фикр алмаша олади. Аммо шартнома тугашига қандайдир ҳафталар қолганида Сэм атрофда ғалати ҳодисалар бўлаётганини пайқаб қолади.
Дункан Жонс режиссёрлигидаги фильм етарлича қизиқарли ишланган. Воқеалар марказидаги Сэм Рокуэлл эса уни тўлдириб, томошабоп қилиб туради.
Изоҳ (0)