Bugun 12-aprel – Xalqaro aviatsiya va kosmonavtika kuni. Ushbu kun munosabati bilan sizga karantin paytida uyda qolib, tomosha qilishingiz mumkin bo‘lgan koinot haqidagi eng sara filmlar ro‘yxatini taqdim qilamiz.
“Interstellar”/ Interstellar
Ilmiy-fantastik drama.
Davomiyligi: 169 daqiqa.
IMDb reytingi: 8,6.
Filmdagi voqealar noma’lum kelajakda rivojlanadi. Qurg‘oqchilik va chang bo‘ronlari keltirib chiqargan global ocharchilik yerga xavf soladi. Yulduzlararo sayohat insoniyatning yagona umidiga aylanadi. NASA xodimlari Saturn sayyorasi orbitasida istiqbolli yulduz tizimiga olib boradigan qora tuynukni topgach, tajribali tadqiqotchilar guruhi inson uchun mos bo‘lgan sharoitlarga ega sayyorani qidirishga kirishadi. Kristofer Nolanning ushbu mashhur filmi yaratilish jarayonida amerikalik fizik va astronom Kip Torn maslahatchi sifatida ishtirok etgan.
“Gravitatsiya”/ Gravity
AQSh, Buyuk Britaniya, 2013-yil.
Ilmiy-fantastik drama, triller.
Davomiyligi: 91 daqiqa.
IMDb reytingi: 7,7.
Film koinotdagi fojia natijasida barcha jamoa a’zolaridan ayrilgan tadqiqotchi Rayan Stoun haqida hikoya qiladi. Yer bilan aloqa butkul yo‘qolgach, uning uyga qaytish haqidagi umidi ham so‘nadi.
Rejissor Alfonso Kuaron va operator Emmanuel Lyubetski tomonidan taqdim etilgan kartina dunyo kinoixlosmandlari tomonidan katta qiziqish bilan qarshi olingan filmlardan sanaladi.
“Marslik”/ The Martian
AQSh, 2015-yil.
Ilmiy-fantastik, sarguzasht film.
Davomiyligi: 142 daqiqa.
IMDb reytingi: 8,0.
“Ares III” tadqiqot kemasi qum bo‘roni sabab Marsni tark etadi. Biroq ekspeditsiya a’zolaridan biri Mark Uotni yer bilan aloqa uzilib, bitta o‘zi qolib ketadi. O‘ta qiyin sharoitda yashab qolish uchun astronavt iroda kuchini namoyish etishi talab qilinadi.
Koinotda yashab qolish mavzusidagi boshqa filmlardan farqli ravishda, rejissor Ridli Skottning Endi Uirning shu nomdagi kitobi asosida suratga olgan filmi juda ijobiy va optimistik ruhdaligi bilan ajralib turadi.
“Jahannam olovi”/ Sunshine
Buyuk Britaniya, 2007-yil.
Ilmiy-fantastika, drama, triller, sarguzasht.
Davomiyligi: 107 daqiqa.
IMDb reytingi: 7,3.
Denni Boylning ilmiy-fantastik filmi “Ikar-II” koinot kemasi ekipajining a’zolari so‘nib borayotgan quyoshni alanga oldirish orqali insoniyatni saqlab qolish uchun yo‘l olishi haqida hikoya qiladi. Bu birinchi missiya emas edi. Jamoa bundan avval xuddi shunday topshiriq bilan ketib 7 yil avval izsiz g‘oyib bo‘lgan “Ikar-I” haqida ham xabardor.
Film atigi 3 oy ichida suratga olingan bo‘lsa-da, unga ulkan vaqt va kuch sarf qilingan. Ssenariy hamda umumiy tayyorgarlikning o‘ziga 2 yil ketgan. Montaj ishlari, vizual effektlar ishlanmasi 1 yil davomida olib borilgan. Rejissor keyinchalik boshqa bu janrda murakkab kartina ishlamasligini bildirgan.
“Apollon-13”/Apollo 13
Sarguzasht, tarixiy film, drama.
Davomiyligi: 140 daqiqa
IMDb reytingi: 7,6.
Ron Hovardning tarixiy dramasi 1970-yilda amalga oshirilgan “Apollon-13” missiyasi davomidagi real voqeliklarga asoslangan. Parvozning ilk 2 kuni hech qanday g‘ayrioddiy hodisalarsiz o‘tadi. Biroq keyin bortda kislorod balloni portlashi ortidan jiddiy avariya yuzaga keladi. Ushbu hodisa nafaqat oyga qo‘nish, balki jamoaning yerga eson-omon yetib olish masalasini ham so‘roq ostida qoldiradi.
“Apollon-13” filmida ishlatilgan “Hyuston, bizda muammo bor” iborasi bir necha yillardan beri ommaviy va mashhur sanaladi. Film insoniyat tomonidan koinotning zabt etilishi mashaqqatlari haqidagi to‘liq va juda qiziqarli kartina hisoblanadi.
“Oy 2112”/ Moon
Buyuk Britaniya, 2009-yil.
Ilmiy-fantastika, drama.
Davomiyligi: 97 daqiqa.
IMDb reytingi: 7,9.
Koinot dispetcheri Sem mana 3 yildirki Oyda yolg‘iz ishlaydi. U nodir gaz olinishini nazorat qilgan holda faqatgina gapiradigan robot bilan fikr almasha oladi. Ammo shartnoma tugashiga qandaydir haftalar qolganida Sem atrofda g‘alati hodisalar bo‘layotganini payqab qoladi.
Dunkan Jons rejissorligidagi film yetarlicha qiziqarli ishlangan. Voqealar markazidagi Sem Rokuell esa uni to‘ldirib, tomoshabop qilib turadi.
Izoh (0)