Элдор Шомуродов Ростовдаги карантин, ҳаётидаги энг муҳим шахс ва азалий орзулари ҳақида

«Ростов» клуби ва Ўзбекистон терма жамоаси ҳужумчиси Элдор Шомуродов Россиянинг Sportbox нашрига интервью берди.

— Элдор, футболсиз қийин эмасми?

— Қийин. Ноодатий ҳиссиётларни бошдан кечиряпман. Бунақасини тасаввур ҳам қилмагандим.

— Ростовдамисиз?

— Ҳа, турмуш ўртоғим билан.

— Изоляция қоидаларига амал қиляпсизми?

— Ҳа, уйда ўтирибмиз. Фақат озиқ-овқат дўконига чиқяпмиз.

— Шаҳарда вазият қандай?

— Менимча, ҳар ерда бўлгани каби. Фақат супермаркет ва дорихоналар ишлаяпти. Одамлар фақат уйи яқинига чиқмоқда.

— Нима деб ўйлайсиз, бу узоққа чўзиладими?

— Ундай бўлмайди деб умид қиламан. Бу тез орада тугайди ва ҳаммаси яхши бўлади.

— Уйда шуғулланяпсизми?

— Ҳа, турли машқларни бажаряпман, мушакларимга зўриқиш беряпман. Ҳар биримизга бу борада дастур ва жадвал берилган.

— Ортиқча вазн йиғишдан қўрқмайсизми?

— Йўқ, менда ҳар доим вазн билан ҳаммаси жойида бўлган. Ҳатто ортиқча икки кило йиғиб қолсам ҳам, уни йўқотиш муаммо эмас.

— Одатдагидек овқатланяпсизми?

— Ҳа.

— «Ростов»нинг бошқа вакиллари билан алоқада бўлиб турибсизми?

— Шундай деса ҳам бўлади. Шунингдек, Валерий Георгиевич (Карпин) билан ҳам. Агар бирор нимани сўрамоқчи бўлсам, унга қўнғироқ қилиб тушиш осон.

— Билишимча, PES 20 футбол симуляторини мунтазам ўйлаб турасиз, ҳатто РПЛ ўтказаётган мусобақада ҳам қатнашяпсиз...

— Бу жуда қизиқ-ку! Тўғри, менда ҳозирча у қадар ўхшамаяпти, чунки PES 13 ўйнашга ўрганиб қолганман. Улар ўртасида фарқ бор.

— ФИФА ҳам ўйнайсизми?

— Ҳа.

— Киберспортга анчадан бери қизиқасизми?

— Бир неч йил бўлиб қолди.

— Бўш вақтда яна нималар билан шуғулланяпсиз?

— Аёлим билан кино кўряпмиз, китоб ўқияпман, мусиқа тинглайман. Шу тариқа кун ўтмоқда.

— Ота-онангиз Ўзбекистонда яшайдими?

— Ҳа, жанубда, мен туғилиб ўсган Сурхандарё вилоятида.

— Улар ҳам карантиндами?

— Албатта, у ерда қоидалар Россияга қараганда анча қаттиқ. Улар билан мунтазам алоқадаман, ҳар куни қўнғироқ қиламан.

— Уйингизда ким овқат тайёрлайди?

— Одатда турмуш ўртоғим, бироқ мен ҳам бир нималар тайёрлашни биламан. Пазандалик — жуда қизиқ.

— Палов тайёрлай оласизми?

— Ҳозирча ўрганяпман. Бу кўринганидек осон иш эмас.

— Қайси овқатни тайёрлай оласиз?

— Сўнгги марта димлама қилдим. Бу қўй гўшти ва сабзавотлардан тайёрланадиган ўзбек таоми. Аёлимнинг айтишича, ёмон чиқмаган. Мен учун ёқимли бўлди.

— Мен ва бошқа кўплаб кишилар учун ўзбек ошхонасининг асосий таоми — бу палов. Оилангизда уни ким яхши тайёрроқ тайёрлайди?

— Кўпчилик. Одатда уни байрам кунлари, одам кўп тўпланган пайтда тайёрлашади.

— Жамоангиз Ростовда ноодатий тарзда йиғилиб турадими? Масалан, ресторан ёки табиат қўйнида?

— Жамоада яхши атмосфера ҳукмрон. Бўлиб туради, барча жамоа аъзолари йиғиламиз. Масалан, кимнингдир туғилган куни ёки қандайдир байрам баҳонасида.

— Ростовнинг машҳур қисқичбақаларини татиб кўрдингизми?

— Албатта.

— Ёқдими?

— Жуда. Айниқса ёқимли шериклар билан. Қаердалигини фарқи йўқ — Дон қирғоқларидами ёки ресторанда.

— Элдор, «Ростов»да энг хушчақчақ футболчи ким?

— Ўйлашимча, Хорен Байрамян. У ҳеч қачон нолимайди. Позитив йигит!

— Футболга қайтамиз. Карантиндан сўнг формага қайтиш учун қанча вақт талаб этилади?

— Ўйлашимча, бир ойча.

— Мавсумда ўз олдингизга қандай мақсадлар қўйгансиз?

— «Ростов» мусобақа жадвалида юқорироқ ўринни эгаллаши учун қўлимдан келган барча ишни қиламан. Шахсий истакларга келсак — Россия чемпионатининг энг яхши тўпурари бўлишни истайман. Менимча, бунинг учун имкониятлар сақланиб турибди.

— Яъни тўпурарлар пойгасида Дзюбани қувиб ўтиш имконияти борми?

— Албатта.

— Айтганча, нега пенальти тепмай қўйдингиз? Бунинг эвазига голлар сони янада кўпроқ бўлиши мумкин эди...

— «Ростов»да пенальти тепувчилар бор, бу борада тажрибали ўйинчилар. Бу ишни улар бажаради.

— Ўзбекистон терма жамоасидаги мақсадингиз?

— Жамоа билан Жаҳон Чемпионатига чиқишни ва яқин орада энг яхши тўпурар бўлишни хоҳлайман.

— Қайси ҳужумчига ўхшашни истардингиз?

— Ҳеч кимга. Мен ўзлигимча қолмоқчиман. Агар қайси футболчиларнинг ўйини ёқишини назарда тутган бўлсангиз, булар: Дрогба ва Фернандо Торрес.

— Ўтган давр ўзбек футболчиларидан кимларни ажратиб кўрсатасиз?

— Миржалол Қосимовни. У бизнинг афсона.

— Жорий мавсумдаги энг ёрқин ўйинингиз?

— Менимча, «Спартак» жамоасига қарши сафар ўйини (1:4 ҳисобида «Ростов» фойдасига ҳал бўлган ўйинда Элдор самарали узатма муаллифига айланганди).

— Фаолиятингиздаги энг чиройли гол-чи?

— Ўзбекистон чемпионатида «Насаф» дарвозасига урган голим. Ўшанда «Бунёдкор» билан 1:0 ҳисобида ғалаба қозонгандик.

— Ҳаётингиздаги энг муҳим шахс ким?

— Отам. Усиз бу даражага ета олмасдим. У менинг тарбиямда муҳим рол ўйнаган.

— Ёқтирган фаслингиз?

— Баҳор.

— У Россия ва Ўзбекистонда ҳар хилми?

— Қаердалигига боғлиқ. Агар Ростов билан солиштирса, жуда ўхшаш.

— Нималарни орзу қиласиз?

— Футолда Жаҳон Чемпионатида тўп суриш, шахсий ҳаётда эса ота бўлиш ва фарзанд тарбиялаш.