Бугунги кунга келиб кўпчилик масофавий ишлашни йўлга қўйган. Коронавирус сабаб эълон қилинган карантин вақтида эса уйидан туриб ишлайдиганлар сони янада ортди. «Домашний очаг» нашри уйда ишлаганда саломатликка путур етказмаслик учун нималарга эътибор бериш кераклигига тўхталди.
Фото: People
Каравотда ноутбук ишлатманг
Уйдан ишлашни бошлаганлар илк кунлари ишга шошиш, кийиниш керакмаслигини ўйлаб хурсанд бўлганларидан ўрниларидан туришни ҳам истамай ноутбукни каравотга олиб келиб ишга киришиши мумкин. Каравот ётишга, диван эса ўтиришга мўлжалланган, ишлашга эмас. Гап шундаки, ноқулай жойлашиб соатлаб ишлаш оқибатида эртаси куни бел, умуртқа поғонаси ва оёқларда оғриқ кузатилиши мумкин. Бундан ташқари, уйқу билан ҳам муаммолар юзага келиши мумкин.
Ечим: Ишлаш учун уйдан чиқмасангиз ҳам тартибга амал қилинг. Нонушта қилиб бўлгач, иш столингизга ўтириб, диққатни бир жойга жамлаб, ишлашингиз керак бўлган соатларда ишланг, тушлик вақтида танаффус қилиб кейин яна ишга киришинг. Ишлаш учун шароит бўлмаса, яратиб олинг. Ҳеч ким кирмайдиган, шовқиндан холи, ёруғлик яхши тушадиган хонага стол-стул қўйинг.
Фото: Bloomberg
Ошхонада ишлай кўрманг
Бу умуман ўзини оқламайдиган ғоя, чунки биринчидан уйдагилар кириб-чиқиб, гапга солиб сизни чалғитади, иккинчидан музлатгич сизнинг ҳудудингизда эканини ҳис қилиб, бутербродлар, ширинликлар еб қўйишингиз, карантиндан чиққунга қадар вазн тўплаб ўзингизга иш кўпайтиришингиз мумкин.
Ечим: Яхшиси деразаси ҳовли ёки кўчага қараган меҳмонхона ёки ётоқхонада ишланг. Компьютерга тикилиб кўзингиз толиққанида табиат манзарасига қараб бироз дам олишингиз, қушлар сайрашидан баҳра олиб, яна ишга киришишингиз мумкин. Қолаверса, деразадан кирадиган тоза ҳаво ишлаш самарадорлигини оширади.
Планшетни тиззага қўйиб ишламанг
Агар шу усулда ишлайдиганлар сирасига кирсангиз, бўйин ва елкаларим нима учун оғрир экан деб ҳайрон бўлманг. Катта одамнинг боши 4—5 килограмм, уни пастга эгиб соатлаб ўтириш, бўйинга оғирлик қилади. Бу усулда ишлаш умуртқа поғонасинининг оғришини кафолатлайди.
Ечим оддий: столда ишланг, монитор кўзингиздан 50—60 см узоқликда бўлиши керак. Шунда ҳам кўзингиз яхши кўрмаса, ёзув шрифтини катталаштиринг.
Фото: Newshub
Тартибга риоя қилинг
Иш учун асосан, ноутбук, қайд дафтарчаси, телефон ва розетка керак бўлади. Кераксиз қоғозлар, стикерлар, бошқа кераксиз нарсалар бўлмаслиги керак. Стол устининг тартибсизлиги диққатни жамлашга ҳам халақит қилади. Қоронғида ишлашингизга тўғри келса, стол лампасидан фойдаланинг.
