Ўзбекистонда ҳукумат аъзолари вирус блокаторларини тақишни бошлади. Ҳукумат аъзоларининг ушбу қурилмаларни таққани 8 апрель, пайшанба куни, Президент Шавкат Мирзиёев раислигида коронавирус пандемиясига қарши кураш ва мамлакатда томорқа хўжалигини ривожлантириш бўйича бўлиб ўтган видеоселектор йиғилиши лавҳаларида кўринган. Бунга «Gazeta.uz» эътибор қаратди.

Фото: Президент матбуот хизмати

Нашрнинг ёзишича, йиғилишда қатнашган бош вазир Абдулла Арипов, ички ишлар вазири Пўлат Бобожонов ва бош вазир ўринбосари — иқтисодий тараққиёт ва камбағалликни қисқартириш вазири Жамшид Қўчқоров вирус блокаторларини таққан. Жамшид Қўчқоров қурилмани костюмига бейжик сифатида илган бўлса, Абдулла Арипов ва Пўлат Бобожоновда қурилмалар белги кўринишида тақилган.

Фото: «Ўзбекистон 24»

Фото: «Ўзбекистон 24»

«Gazeta.uz»нинг аниқлашича, бейжик кўринишидаги қурилма Air Doctor, қалқонни эслатадиган белги кўринишидаги қурилма эса Ecom Air Mask деб номланади.

Фото: «Gazeta.uz»

Вирус блокаторларини ишлаб чиқарувчи Япония компаниясининг сайтида хабар берилишича, қурилма ҳавони дезинфекцияловчи ва дезодорация қилувчи хлор диоксидини тарқатиб, «бактериялар ва вируслар каби патоген микроорганизмларни самарали равишда йўқ қилади».

Фото: «allergstop.ru»

Қайд этилишича, қурилма ёпиқ биноларда жуда самарали ҳисобланади. Очиқ ҳавода ва ҳаво оқимлари кучли бўлган биноларда унинг самарадорлиги камаяди.

Нашрнинг қайд этишича, ушбу турдаги қурилмалар ҳозирги вақтгача керакли тадқиқотлардан ўтказилмаган ва уларнинг вирусларга қарши ишончли ҳимоя эканлиги исботланмаган.

Эслатиб ўтамиз, 8 апрель куни бўлиб ўтган мазкур йиғилишда Президент Шавкат Мирзиёев Ўзбекистонда коронавирусдан вафот этган 3-беморнинг оиласига ҳамдардлик билдирди, пандемия шароитида озиқ-овқатга бўлган талабни қондириш учун қишлоқ хўжалиги кооперативларини ривожлантириш ҳамда шахсий томорқалардан самарали фойдаланиш бўйича кўрсатмалар берди.