Ўзбекистон Президенти Шавкат Мирзиёев 9 апрель куни Тожикистон Президенти Эмомали Раҳмон билан телефон орқали мулоқот қилди. Бу ҳақда Президент матбуот хизмати хабар берди.
Маълум қилинишича, давлат раҳбарлари мамлакатлар ва Марказий Осиё минтақасидаги коронавирус тарқалиши билан боғлиқ жорий эпидемиологик вазият юзасидан фикр алмашди.
Коронавирусга қарши самарали курашиш мақсадида мувофиқлашган чораларни ишлаб чиқиш, ўзаро кўмаклашиш, тегишли тиббиёт ва бошқа алоқадор хизматлар ўртасидаги яқин мулоқотларни давом эттириш муҳимлиги қайд этилди.
Пандемиянинг икки томонлама яхши қўшничилик ва стратегик шериклик муносабатларининг ривожланиш суръатига салбий таъсирини камайтириш учун олдиндан чора кўриш лозимлиги алоҳида таъкидланди. Савдо-иқтисодий, инвестиция, молия ва транспорт-коммуникация соҳалари, шунингдек, ҳудудлараро ҳамкорлик, шу жумладан пойтахт шаҳарлар Тошкент ва Душанбе ўртасидаги алмашинувлар доирасида амалга оширилаётган лойиҳалар бу борадаги устувор йўналишлар сифатида белгилаб олинди.
Суҳбатда Ўзбекистон ва Тожикистон Президентлари минтақавий ҳамкорликка оид ва халқаро аҳамиятга молик айрим долзарб масалаларни ҳам кўриб чиқди.
Аввалроқ Ўзбекистон Тожикистонга ун ва антисептиклардан иборат 18 вагон гуманитар ёрдам юборгани ҳақида хабар берилган эди.
Эслатиб ўтамиз, Шавкат Мирзиёев ва Эмомали Раҳмон 3 апрель куни ҳам телефон орқали коронавирусга қарши курашда ҳамкорлик масаласини муҳокама қилган эди. Бундан ташқари, шу пайтгача Шавкат Мирзиёев коронавирусга қарши кураш масаласида Қозоғистон, Қирғизистон, Туркманистон ва Афғонистон президентлари билан телефон орқали мулоқот қилган.
Маълумот учун, Ўзбекистонда коронавирусга чалинганлар сони 582 нафарга етган, улардан 38 нафари тузалган бўлса, 3 нафари ҳаётдан кўз юмган. Тожикистонда эса ҳозирча коронавирус билан боғлиқ биронта ҳам ҳолат қайд этилмаган.
Изоҳ (0)