Ўзбекистонда коронавирусга чалинган яна 8 нафар бемор тузалди

Ўзбекистонда коронавирус инфекциясига чалинган беморлардан яна 8 нафари тузалди. Тузалганлар Вирусология илмий-текшириш институти клиникасидан Соғлиқни сақлаш вазири Алишер Шодмонов ва бошқа масъуллар иштирокида Республика ихтисослаштирилган терапия ва тиббий реабилитация илмий-амалий тиббиёт марказига кузатилди. Бу ҳақда Соғлиқни сақлаш вазирлиги маълум қилди.

Шу тариқа, айни пайтда Ўзбекистонда коронавирус инфекциясига чалинган беморларнинг 38 нафари соғайди (бунгача етти, бир, тўрт, 13 ва беш нафар бемор соғайиб, реабилитацияга кузатилгани ҳақида хабар берилган эди).

Вазирлик томонидан қайд этилишича, шифокорлар беморларни даволашда дунё тажрибаси, хусусан, Жаҳон соғлиқни сақлаш ташкилоти, Германия, Жанубий Корея, Хитой, Япония каби қатор мамлакатларнинг энг нуфузли мутахассислари тавсияларидан фойдаланмоқда. Бундан ташқари, Президент топшириғига кўра, ҳар бир беморга икки нафардан шу соҳада кўзга кўринган тажрибали мутахассислар жалб қилиниб, стандартлар бўйича даволаш чоралари кўрилмоқда.

Шунингдек, шифокорлар беморларни даволаш жараёнида мамлакатнинг етук пулмонолог, кардиолог, терапевт, эндокринолог, реаниматолог каби қатор мутахассислар билан телемулоқот ўрнатиб, улардан керакли тавсияларни олмоқда. Тор мутахассислар билан ҳамкорлик беморларнинг ҳолати юзасидан маслаҳатлашиш, аниқ ташхис қўйиш ва даволаш имконини бермоқда.

Ўзбекистонда коронавирусга чалинганлар сони 9 апрель Тошкент вақти билан соат 15:30 ҳолатига кўра 582 кишига етди. Шу пайтга қадар уч киши (бир аёл ва икки эркак) коронавирус сабаб вафот этди.

Эслатиб ўтамиз, Ўзбекистонда 4—7 апрель кунлари коронавирусга чалиниш билан боғлиқ ҳолатлар айниқса кўп қайд этилди. Хусусан, 6 апрель куни 115 кишида коронавирус аниқланган — бу кунлик рекорд; шунингдек, 6 апрель соат 10:00 дан 7 апрель соат 15:00 гача бўлган оралиқда, Бухоро (65 нафарга) ва Қорақалпоғистонда (саккиз баробарга) беморлар сони кескин кўпайган.