Коронавирус билан касалланиб, шифохонага ётқизилган Буюк Британия бош вазири Борис Жонсоннинг соғлиғида ўтган бир кеча давомида ҳеч қандай ўзгариш рўй бермади, деб хабар қилади Reuters.
6 апрель куни Британия ҳукумати раҳбарининг канцелярияси Жонсоннинг аҳволи оғирлашгани сабаб интенсив терапия бўлимига жойлаштирилгани ҳақида хабар берганди. Sky News телеканали маълумотига кўра, 55 ёшли Борис Жонсонга эҳтиёт чораси сифатида сунъий нафас олдириш аппарати керак бўлиб қолиши мумкинлиги инобатга олиниб, жонлантириш бўлимига ўтказилган.
Ҳозирча бош вазир сунъий нафас олдириш аппаратига уланмаган. Борис Жонсон коронавирусга чалинганини 27 март куни маълум қилган эди. Ўшанда бош вазирда енгил симптомлар кузатилган. Орадан 10 кун ўтиб, симптомлар ҳали ҳам кузатилаётгани боис у касалхонага ётқизилган эди.
Аввалроқ Қиролича Елизавета II Буюк Британия ва Ҳамдўстлик давлатлари аҳолисига телевидение орқали мурожаат йўллагани ҳақида хабар берилганди.
Изоҳ (0)