Тошкентда ёмғир: одамлардан «дам олаётган» табиат, серқатнов велосипедчилар, ҳаракатланаётган махсус техника — суратларда

«Ўзгидромет» Ўзбекистонда апрель ойининг биринчи куни ёмғирли об-ҳаво билан бошланишини маълум қилган эди.

Унда, ҳаво ўзгариб туриши, вақти-вақти билан ёмғир ёғиши, шарқий шамол йўналишини ўзгартириб, ғарбдан 5-10 метр/секунд тезликда эсиши, ҳарорат кечаси 10-12 даража илиқ, кундузи 15-17 даража илиқ бўлиши айтилган. Об-ҳавонинг ўзгариши Каспий денгизи жануби-ғарбий қисми устидаги жанубий циклон Ўзбекистон ҳудудига силжиши натижасида рўй берган.

2 апрель, пайшанба куни, тунда ва эрталаб Тошкент вилояти ва Фарғона водийси вилоятларида об-ҳаво нобарқарор бўлиб туради, кундузи ёғингарчилик бўлмайди. Кечаси ҳарорат 5-10 даража бўлади, кундузи бир оз кўтарилиб, 15-20 даражани ташкил қилади.

«Дарё» мухбири 27 мартдан буён кўчага кам чиқиши тавсия этилган шаҳар аҳли ноқулай об-ҳаво шароитида нималар билан банд эканлигини кадрларга муҳрлади.

Эслатиб ўтамиз, Ўзбекистонга коронавируснинг кириб келиши ва тарқалишининг олдини олиш юзасидан чора-тадбирлар дастурини тайёрлаш бўйича Республика махсус комиссияси қарорига мувофиқ, 22 мартдан Тошкентда жамоат транспорти ҳаракати тўхтатилган. 30 мартдан эса шахсий транспортдан фойдаланишга чеклов қўйилиши маълум қилинган.

1 апрель ҳолатига кўра, Ўзбекистонда коронавирусга чалинганлар сони 173 нафарга етган.

Одамлардан «дам олаётган» табиат. 

Ноқулай об-ҳаво шароитида ҳам жамоат транспорти ва шахсий автомобилларсиз қолган аҳоли ҳаракатланишнинг турли йўлларига мурожаат қилмоқда. Кимдир пиёда, бошқа биров велосипед ёки мотоциклда.