Ўзбекистонда коронавирус пандемиясига қарши кураш ҳамда бюджетни қўллаб-қувватлаш мақсадида Осиё тараққиёт банкидан 1 миллиард доллар миқдорида маблағ ажратишни сўради. Бу ҳақда Инвестициялар ва ташқи савдо вазирлиги томонидан маълум қилинди.
Вазирлик томонидан хабар берилишича, 1 апрель куни Ўзбекистон бош вазири ўринбосари — инвестициялар ва ташқи савдо вазири Сардор Умрзоқов видеоконференция форматида Осиё тараққиёт банки президенти Масацугу Асакава билан мулоқот қилди. Суҳбат чоғида Ўзбекистонда коронавирус тарқалишидан аҳолини ҳимоялаш ва глобал пандемиянинг мамлакат ижтимоий-иқтисодий жараёнларига таъсирини юмшатиш бўйича олиб борилаётган ишлар ҳамда мазкур масалаларда ОТБнинг Ўзбекистонга кўрсата оладиган ёрдами механизмлари муҳокама қилинди.
Таъкидланишича, суҳбат давомида ОТБ президенти ушбу ўта оғир пайтда Ўзбекистонни коронавирусга қарши курашга маблағ жалб қилиш, тадбиркорларни қўллаб-қувватлаш ва иқтисодиётнинг барқарор ишлашини таъминлаш орқали ҳар томонлама қўллаб-қувватлашга тайёрлигини билдирди.
Масацугу Асакава ОТБ Ўзбекистоннинг вирус тарқалиши билан боғлиқ тиббий эҳтиёжлари учун 200 минг долларга тенг миқдорда грант ажратилишини маъқуллаган.
Қайд этилишича, ОТБ томонидан Ўзбекистон соғлиқни сақлаш тизимини ҳар томонлама қўллаб-қувватлашга йўналтирилган қўшимча маблағларни жалб қилиш истиқболлари кўриб чиқилмоқда.
Бундан ташқари, яқин кунларда банк раҳбарияти томонидан пандемия шароитида Ўзбекистон иқтисодиёти ривожланишини рағбатлантириш ва барқарорлигини таъминлаш учун қўшимча молиявий ресурсларни ажратиш масаласи кўриб чиқилади.
ОТБнинг Ўзбекистонга 1 миллиард долларгача бюджет маблағларини ажратиш тўғрисидаги аризани кўриб чиқиш масаласи алоҳида муҳокама қилинди. ОТБ раҳбари ушбу масалани ҳал қилиш учун банкда алоҳида гуруҳ тузгани ва ушбу масалани маъқуллаш ва молиявий ёрдам маблағларини ажратиш жараёнларини тезлаштириш учун барча саъй-ҳаракатлар амалга оширилишини маълум қилди.
Эслатиб ўтамиз, Ўзбекистонда коронавирус сабабли юзага келадиган иқтисодий муаммоларга қарши курашиш учун Инқирозга қарши жамғарма тузилиб, унга 10 триллион сўм ажратилиши маълум қилинди. Коронавирус сабабли зарар кўрадиган соҳалардаги корхоналарнинг кредит муддатларини узайтириш, туристик йиғимлар ундиришни вақтинча тўхтатиш бўйича кўрсатма берилган. Шунингдек, жисмоний шахслар ва ЯТТларнинг кредит тўловларини қайтаришида ҳам имтиёзлар берилади.
Изоҳ (0)