Россия президенти Владимир Путин ҳукуматга мамлакат ёки унинг муайян қисмида фавқулодда ҳолат ва кучайтирилган тартиб режимини эълон қилиш ваколатини берди. Россия давлат раҳбари ушбу чора кўзда тутилган қонунни имзолади, деб хабар бермоқда «РИА Новости».
Қонун шарҳида ҳужжатнинг мамлакатда коронавирус инфекциясининг тарқалиши сабаб юзага келаётган ҳодисаларга нисбатан фавқулодда чоралар кўриш юзасидан муносабатларни тартибга солиш учун қабул қилингани қайд этилган.
Шунингдек, Россия вазирлар маҳкамаси тиббиёт буюмлари савдосини чеклаш, ҳарбий ҳаракатларни амалга ошириш мақсадида фавқулодда ҳолат, профилактика ва касалликни даволашда ишлатиладиган препаратлар ва тиббиёт воситаларини рўйхатга олиш бўйича алоҳида тартиб жорий қилиш ваколатини ҳам олган.
Қонун ҳукуматга 2020 йилда ягона етказиб берувчидан харидлар амалга оширишга ҳам рухсат беради. Ҳужжатда томонларга боғлиқ бўлмаган шароитдан, яъни коронавирус тарқалиши билан боғлиқ вазиятлардан келиб чиқиб шартномаларнинг ижро муддатини ўзгартириш мумкинлиги кўзда тутилган.
Шунингдек, энди РФ вазирлар маҳкамаси банкротлик ҳақидаги ишларга нисбатан мораторий эълон қилиш имкониятига ҳам эга.
Бундан ташқари, қонунда туроператорларни қўллаб-қувватлаш масалалари ҳам ҳисобга олинган: янги моддага кўра, шахсий жавобгарлик бўйича фондларга тўловлар муддатини ўзгартириш, шунингдек, бу каби жамғармаларнинг туристларга ҳукуматнинг ҳар бир «ёпиқ» давлат бўйича чиқарилган қарори асосида маблағларни қайтариш механизми ҳам ишлаб чиқилган.
Аввалроқ Владимир Путин ташриф буюрган шифохонанинг бош шифокорида коронавирус аниқлангани, Москвада яшовчи аҳоли чиқинди ташлагани чиқиш учун ҳам рухсатнома олиш мажбуриятини олаётгани хабар қилинганди.
Изоҳ (0)