Қирғизистон президенти Сўронбой Жээнбеков мамалакат бош вазири ўринбосари Олтиной Омурбекова ва соғлиқни сақлаш вазири Космосбек Чўлпонбоевни ўз лавозимларидан озод этди. Бу ҳақда Қирғизистон президенти сайтида маълум қилинди.
Икки мансабдорнинг нима сабабдан эгаллаб турган лавозимидан озод қилингани ҳақида маълумот берилмаган. Бироқ 31 март куни бўлиб ўтган хавфсизлик кенгашининг йиғилишида Жээнбеков мамлакат Соғлиқни сақлаш вазирлиги ва Коронавирусга қарши кураш бўйича республика штабини кескин танқид қилган. Бунга касалланганлар ва улар билан алоқада бўлганларни аниқлаш бўйича ишларнинг самарадор эмаслиги ва бошқа камчиликлар сабаб бўлган.
Йиғилиш якунига кўра, мамлакат бош вазирига коронавирусга қарши самарасиз курашаётган мансабдорларга чора кўриш ҳақида топшириқ берилган.
Айни пайтда Қирғизистонда коронавирусга чалинганлар сони 107 кишига етган. Мамлакатнинг бутун ҳудуди бўйлаб фавқулодда ҳолат режими жорий этилган. Мамлакат пойтахти Бишкек ва бошқа ҳудудларда коронавирус сабаб бир қатор тақиқлар қўйилган.
Изоҳ (0)