Афғонистонда коронавирус инфекцияси билан боғлиқ вазият энг ёмон ҳолатда жорий йилнинг декабригача давом этиши мумкин. Бу ҳақда Афғонистон соғлиқни сақлаш вазири Ферозуддин Фероз маълум қилди, деб ёзмоқда «Afganistan.ru».
Коронавирус билан боғлиқ вазиятни баҳолаб, Афғонистон соғлиқни сақлаш вазирлиги раҳбари мамлакатдаги эпидемиологик вазият қўшни давлатлардаги каби ёмон эмаслигини, аммо касаллик тарқалишига қарши кураш чораларини давом эттириш зарурлигини тан олди.
Сўнгги маълумотларга кўра, Афғонистонда коронавирусга чалинганларнинг умумий сони 170 кишига етган, улардан тўрт нафари вафот этган, беш нафар бемор касалликдан тузалган.
Касалланиш билан боғлиқ 75 фоиздан ортиқ ҳолат Ғарбий Ҳирот вилоятида қайд этилган. Мазкур ҳудуд орқали февраль ва март ойларида Эрондан эпидемиядан қочган 30 мингдан ошиқ афғон қочқини қайтган.
Қайд этилишича, Эронда касалланганлар сони 40 минг кишига, коронавирусдан вафот этганлар сони эса 2757 кишига етган. 29 март куни Теҳрондаги Афғонистон элчихонаси норасмий манбаларга таяниб, мамлакатда 50 га яқин афғон фуқаросининг ўлими ҳақида хабар берган.
Таъкидланишича, коронавирусга қарши Ҳирот ва Кобулда кескин чоралар кўрилмоқда. Шаҳарларга олиб борувчи катта йўллар ёпилган, шаҳар ичкарисида ҳаракатланиш чекланган, масжидлар, умумий овқатланиш жойлари ва бошқа жамоат жойлари ёпилмоқда.
Афғонистон соғлиқни сақлаш вазирлигининг маълумотларига кўра, илгари полиомиeлитга қарши курашда иштирок этган 30 минг киши коронавирусга қарши курашга жалб қилинган.
Эслатиб ўтамиз, Афғонистонда коронавирус билан касалланишнинг илк ҳолати февраль ойининг охирида қайд этилган эди.
Аввалроқ, Шавкат Мирзиёев ва Ашраф Ғани коронавирусга қарши кураш масаласини муҳокама қилган эди.
Изоҳ (0)