Ўзбекистонликларга карантин қоидалари барча ҳолатларга тааллуқли бўлиши ва фуқароларга бу пайтда бошқа вилоятлардаги дафн маросимларида иштирок этишга рухсат берилмаслиги айтилди. Бу ҳақда АОКА ҳузуридаги штабда 1 апрель, чоршанба куни, ўтказилган брифингда ИИВ ахборот хизмати раҳбари Шоҳрух Ғиёсов маълум қилди.
«Карантин чекловлари халқаро тажриба ва талабларга асосан ўрнатилган. Афсуски, қанчалик оғир бўлмасин, ўрнатилган чеклов барчага истисносиз тааллуқли бўлиб, бошқа вилоятда бўлган яқин қариндошларингизнинг дафн маросимида қатнашолмайсиз», — дейди у.
Шунингдек, оғир касал бўлган беморга тиббиёт муассасасидан жавоб берилган ҳолатда уни бир вилоятдан иккинчисига олиб ўтиш тартиби ҳам тушунтирилди.
«Агар сиз оғир касал бўлган фуқарони, масалан, Тошкент шаҳридан ўзининг доимий яшайдиган бошқа вилоятига олиб бормоқчи бўлсангиз, унинг ҳақиқатан ўша вилоятда рўйхатда турганини исботловчи паспорти ва соғлиқни сақлаш ходимларининг тегишли хулосаси асосида постлардан олиб ўтишингиз ва уйига элтиб қўйишингиз мумкин», — деди Шоҳрух Ғиёсов ва касални уйига олиб борган фуқаро карантин чекловлари тугамагунича ортга қайтолмаслигини таъкидлади.
Мавзуга доир:Коронавирусдан вафот этган киши қандай дафн этилади? Ўзбекистон мусулмонлари идораси жавоб берди
Изоҳ (0)