Жаҳон соғлиқни сақлаш ташкилоти бутун дунёда коронавирусдан тузалган кишилар сонини эълон қилишни тўхтатди. Бу ҳақда «РИА Новости» хабар берди.
ЖССТ вакили Тарик Язаревичнинг маълум қилишича, кўп давлатлар касалликдан тузалганлар ҳақидаги маълумотларни узатишда тизимлиликка риоя қилмаётгани сабабли шундай қарор қабул қилинган.
Унинг сўзларига кўра, Хитойдан ташқарида касалликдан тузалиш ҳолатлари ҳақида турли манбалардан расмий тасдиқланган ягона маълумот олишнинг имкони бўлмаяпти. Барча давлатлар ҳам ушбу маълумотларни ташкилотга тизимли тарзда тақдим эта олмаяпти.
ЖССТ вакилининг қайд этишича, коронавирусга нисбатан иммунитет ишлаб чиқилаётгани борасида эпидемиологик маълумотларни кўпроқ олиш, шунингдек, беморларнинг касалликдан тўлиқ халос бўлганини аниқловчи усулларни топиш керак.
Сўнгги маълумотларга кўра, дунёда коронавирус юқтириб олганларнинг сони 884 мингдан ошган, 185 мингдан ортиқ киши тузалган, 44 мингдан зиёд бемор вафот этган.
Эслатиб ўтамиз, БМТ бош котиби коронавирусга қарши курашиш учун жаҳон ЯИМининг 10 фоизи миқдорида пул чоп этишни таклиф қилди. Оқ уй экспертлари коронавирус оқибатида 2,2 миллион америкалик вафот этиши мумкинлигини тахмин қилмоқда. Ўтган бир сутка ичида АҚШда коронавирус оқибатида 700 дан ортиқ одам вафот этган бўлса, Хитойда бу кўрсаткич етти кишини ташкил этган.
Изоҳ (0)