O‘tgan bir sutka ichida AQShda koronavirus oqibatida 770 kishi vafot etdi. Bu haqda federal va mahalliy hukumat tomonidan taqdim etilayotgan ma’lumotlarga tayanib, CNN xabar berdi.
Ma’lumotlarga ko‘ra, ushbu ko‘rsatkich mamlakatda bir kun ichida kuzatilgan eng yuqori o‘lim darajasidir. Pandemiya boshlanganidan buyon butun mamlakat bo‘ylab koronavirus oqibatida vafot etganlar soni 3774 kishiga yetgan.
31-mart holatiga ko‘ra, AQSh koronavirus qurbonlari soni bo‘yicha Xitoyni ortda qoldirib, uchinchi o‘ringa chiqib oldi. O‘lim darajasi eng yuqori ko‘rsatkichga ega davlatlar orasida Italiya — birinchi o‘rinda (12 428 kishi), undan keyin Ispaniya (8269) joy olgan.
So‘nggi ma’lumotlarga ko‘ra, O‘zbekistonda koronavirus bilan kasallanganlar soni 172 nafarga yetgan.Mavzuga doir: AQShda koronavirusni bezgakka qarshi dorilar bilan davolashga ruxsat berildi
Eslatib o‘tamiz, avvalroq 12-mart kuni Umra safaridan Turkiya orqali qaytgan namanganlik ayolning koronavirusga chalingan 72 yoshli onasi 27-mart kuni tongda infarktdan vafot etgani, uning dafn marosimida birorta ham qarindoshi qatnashmagani haqida aytilgandi. Bundan tashqari, koronavirusning ikkinchi qurboni — Toshkentda vafot etgan 39 yoshli shifokor kasalligini yashirib, o‘zini uyda davolashga uringani xabar qilingan edi.
