АҚШ Адлия вазирлиги Венесуэла президенти Николас Мадурони қурол сақлаш ва гиёҳванд моддалар савдосида айблади. Meduza’нинг хабар беришича, бу ҳақда вазирлик сайтида маълум қилинган.
Унда айтилишича, Мадуро камида 1999 йилдан бошлаб кокаинни Колумбиядан Венесуэла орқали АҚШга етказиш билан шуғулланувчи Cartel de Los Soles наркокартели етакчиларидан бири бўлган.
АҚШ Адлия вазирлигига кўра, шундай қилиб, картер аъзолари нафақат бойиган ҳолда ўз ҳукмронлигини мустаҳкамлашга, балки америкаликлар «соғлиғи ва фаровонлигига путур етказиб, АҚШни кокаинга чўкирмоқчи» ҳам бўлган.
Мадурога қарши тўртта айблов эълон қилинган бўлиб, уларнинг ҳар бирида умрбод озодликдан маҳрум этишгача бўлган жазо чоралари кўзга тутилган. АҚШ ҳукумати унинг айбини исботловчи маълумотлар учун 15 миллион доллар мукофот пули эълон қилди.
Мадуродан ташқари, АҚШ Адлия вазирлиги Венесуэланинг яна бир қатор собиқ ва амалдаги мансабдорларига, шунингдек, Колумбия инқилобий қуролли кучлари (FARC)нинг бир неча етакчиларига нисбатан ҳам айбловларни илгари сурган. Уларнинг барчаси гиёҳванд моддаларни Колумбиядан АҚШга олиб ўтишда тил бириктирган, деб тахмин қилинмоқда.
Маълумот учун, Cartel de Los Soles («Қуёшлар картели») — бу халқаро гиёҳванд моддалар савдоси билан шуғулланувчи венесуэлалик жиноий гуруҳ бўлиб, у ҳақда 1999 йил бошларидан маълум бўлган. Тахминларга кўра, у Венесуэла армиясининг ҳарбий раҳбарлари томонидан бошқарилади.
Венесуэла президентининг бир неча шериклари картель билан алоқаси борлиги учун санкцияларга дучор бўлган, Мадуро рафиқасининг жиянлари эса АҚШда гиёҳванд моддалар контрабандаси учун қамоққа олинган.
Изоҳ (0)