Бош прокуратура ва МИБ ходимлари коронавирусга қарши кураш учун ўз маошларининг бир қисмини хайрия қилди

Ўзбекистон Бош прокуратураси, Бош прокуратура ҳузуридаги Иқтисодий жиноятларга қарши курашиш департаменти ва Мажбурий ижро бюроси ходимлари коронавирусга қарши кураш учун ўз иш ҳақларининг бир қисмини беғараз ёрдам сифатида ажратди. Бу ҳақда Бош прокуратура томонидан маълум қилинди.

Қайд этилишича, COVID-19 пандемиясига қарши курашда фуқароларни руҳан қўллаб-қувватлаш мақсадида ташкил этилган «Ўзбекистон Меҳр-шафқат ва саломатлик» жамоат фондига тушаётган беминнат маблағлар меҳр-мурувват, саховат каби ўзбек халқига хос хислатларни янада кўпроқ намоён этмоқда.

Хабар берилишича, мазкур акция доирасида Бош прокуратура, Бош прокуратура ҳузуридаги Иқтисодий жиноятларга қарши курашиш департаменти ва Мажбурий ижро бюроси ходимлари ҳам ихтиёрий равишда ўз иш ҳақларининг бир қисмини мазкур фондга беғараз ўтказиб берди.

Ўзбекистонда коронавирус сабабли юзага келадиган иқтисодий муаммоларга қарши курашиш мақсадида Инқирозга қарши кураш бўйича жамғарма ташкил этилди ва унга 10 триллион сўм ажратилиши белгиланди. Шунингдек, якунига қадар солиқ текширувларига мораторий эълон қилинди ҳамда бир қатор иқтисодий чоралар белгиланди. Олий Мажлис Қонунчилик палатасида 20 март, жума куни, парламент қуйи палатаси депутатлари ва Сенати аъзолари иштирокида бўлиб ўтган йиғилишда бош вазир ўринбосари Жамшид Қўчқоров Инқирозга қарши чоралар дастури бўйича ахборот берган эди.

Эслатиб ўтамиз, 24 мартдан Ўзбекистонда коронавирус инфекцияси тарқалишига қарши кучайтирилган тартиб жорий этилди, деҳқон бозорларидан ташқари барча бозорларнинг фаолияти тўхтатилди.

Айни пайтда Ўзбекистонда коронавирусга чалинганлар сони 49 кишини ташкил этмоқда.