Mudofaa vazirligi karantinga olingan hududlarda nazorat kuchaytirilganini ma’lum qildi

O‘zbekiston mudofaa vazirligi koronavirus pandemiyasi sabab karantin hududlarida xavfsizlik va nazorat ta’minlashini ma’lum qildi. Bu haqda Mudofaa vazirligi axborot va ommaviy kommunikatsiyalar departamenti xabar qilgan.

“O‘tgan yilning so‘nggi oylaridan boshlangan koronavirus balosi bugun dunyoning deyarli barcha mamalakatini o‘rgimchak to‘ri misoli qamrab olishga ulgurdi. Afsuski, bu bizni ham chetlab o‘tmadi. Joriy yilning 15-martda yurtimizda ham koronavirusga chalingan bemorlar mavjudligi aniqlandi.

Ushbu infeksiyasining qamrovi kengaymasligi uchun hukumat darajasida barcha choralar ko‘rilmoqda. Jumladan, barcha turdagi ta’lim dargohlarida vaziyat barqarorlashgunga qadar ta’til e’lon qilindi. Jamoat transporti harakati ham to‘xtatildi va boshqa ko‘plab zarur choralar amalga oshirildi.

Hozirgi kunda chet mamlakatlarda bo‘lib turgan fuqarolarimiz maxsus charter reyslar orqali mamlakatimizga olib kelinib, 14 kunlik karantinda saqlanmoqda. Karantinga olingan obyektlarda fuqarolar xavfsizligini ta’minlash, qolaversa, tibbiy nazoratdagi yurtdoshlarimizning o‘zboshimchalik bilan belgilangan hududni tark etishlarining oldini olish maqsadida nazorat choralari kuchaytirilmoqda.

Fuqarolarimiz xavfsizligini ta’minlash maqsadida bugun karantinga olingan obyektlarda Mudofaa vazirligi harbiy xizmatchilari kun-u tun o‘z xizmat faoliyatini olib bormoqda. Xavfsizlikning bu tarzda kuchaytirilishi, shubhasiz, hamyurtlarimiz salomatligi va mamlakatimizning ushbu kasallikdan talafotsiz va tezroq xalos bo‘lishiga zamin yaratadi.

Karantin chora-tadbirlari belgilangan joylarda xizmat o‘tayotgan harbiy xizmatchilarning huquqiy himoyasini mustahkamlash, aholiga tegishli tushuntirish ishlari olib borish maqsadida Respublika Harbiy prokuraturasi va Davlat xavfsizlik xizmati xodimlari mazkur obyektlarda bo‘ldi. Hamkorlikda olib borilayotgan bu kabi ishlar, albatta, kasallikning chekinishiga xizmat qiladi”, -deyiladi Mudofaa vazirligi xabarida.

23-mart holatiga ko‘ra, O‘zbekistonda koronavirus bilan kasallangan soni 45 nafarni tashkil etmoqda. Hukumat 65 yoshdan oshganlarga ko‘chaga chiqmaslikni tavsiya qilgan, jamoat joylarida niqobsiz yurish taqiqlangan, 25-martdan boshlab niqobsiz yurganlar jarimaga tortiladi, O‘zbekistonda tibbiy niqob tanqisligini keltirib chiqarganlarga ham qat’iy choralar ko‘rilishi belgilangan. Toshkentdagi barcha korxona va muassasalarga ishchilarni ta’tilga chiqarish haqida topshiriq berilgan va ish masofadan turib tashkil etilishi mumkin. Aholining kundalik ehtiyoji inobatga olingan holda dehqon bozorlari, supermarketlar, oziq-ovqat do‘konlari, shifoxonalar, poliklinikalar, dorixonalar, turli taomlarni yetkazib berish xizmatlari faoliyati to‘xtatilmasligi xabar qilingan.