Вилоятлараро йўл ҳаракати хавфсизлиги масканлари фаолияти қайта тикланади. Бу ҳақда ички ишлар вазири ўринбосари Дониёр Қодиров ахборот ва оммавий коммуникациялар агентлиги махсус штабида ташкил этилган брифингда маълум қилган.

Фото: «Nuz.uz»

ИИВ мутасаддиси мазкур тадбир давомида карантин даврида аҳоли хавфсизлигини таъминлашда юзага келган қатор масала ва муаммолар юзасидан саволларга жавоблар берган.

«Карантин даврида вилоятларда илгари фаолият юритган йўл ҳаракати хавфсизлиги масканларининг фаолияти вақтинча тикланади.

Бу чорани юзага келаётган муаммоларни тизимли бартараф этиш мақсадида қўллаяпмиз. Уларнинг вазифаси Тошкент шаҳрига кириб келаётган автомобиль ҳайдовчиларига ҳаракат чеклангани ҳақида (янгиликлардан бехабар бўлса) ахборот беришдан иборат. Ҳар бир вилоятдаги йўл ҳаракати хавфсизлиги масканларида огоҳлантирув ва маълумот бериш тизимини йўлга қўямиз.

Постларда Миллий гвардия ва Ички ишлар вазирлиги ходимлари бирга ҳамкорликда хизмат олиб боради», — дея таъкидлаган Дониёр Қодиров.

Аввал Тошкент шаҳрининг 2020 йилнинг 24 март куни соат 00:01 дан бошлаб ёпилиши , 22 мартдан Тошкент шаҳри ҳудудида барча жамоат транспорти — автобус, метро ва йўналишли таксилар ҳаракати вақтинчалик тўхтатилгани ҳақида хабарлар берилган. Тошкент вилояти Бўстонлиқ туманига кириш ҳам ёпилган. Вилоятдаги барча буюм бозорларининг фаолияти ҳам вақтинча тўхтатилган. Олий Мажлис қонунчилик палатаси депутати «Юксалиш» умуммиллий ҳаракати раиси Акмал Бурхонов Тошкентда фавқулодда ҳолат жорий этиб, карантинни назорат қилишга армияни қисман сафарбар этишни таклиф қилган.