Санитария-эпидемиологик осойишталик агентлиги директори Баҳром Алматовнинг «Дарё» мухбирига маълум қилишича, Хитой ҳукумати коронавирусга оид 2,5 мингта тестни Ўзбекистонга текинга бермоқчи.
«Хитойнинг Ўзбекистондаги элчихонаси вакиллари билан тестлар ва хитойлик мутахассисларни юртимизга олиб келиш учун 24 март куни Урумчи шаҳридан чартер рейс ташкил қилиш юзасидан муҳокамалар олиб бордик. Хитой ҳукумати бизга 2,5 мингта тестни текинга бермоқчи. Гап пулда ҳам эмас, тестларни сотиб олишга тайёрмиз ва бунга маблағларимиз етарли. Ундан ташқари, 100 мингта тест буюртма қилдик ва бу тестларни чартер рейсга етказиб беришда элчихона маъмуриятидан амалий ёрдам беришларини сўрадик», — деди агентлик раҳбари.
Унинг қўшимча қилишича, хитойлик тажрибали мутахассислар Ўзбекистондаги эпидемиологик вазиятни бошқаришда кўмак беради.
«Хитойдан юртимизга келиб, амалга оширилаётган ишлар, эпидемиологик вазиятни бошқариш ҳамда даволаш бўйича консультантлар чақирганмиз. Улар коронавирусга қарши дориларнинг энг самаралийси қанақа экани ҳақида ўз тавсияларини бериб боради. Доимий консультация бериб туриш учун уч нафар эксперт жалб қилишларини сўраганмиз», — дейди Баҳром Алматов.
Изоҳ (0)