Антисептик хусусиятга эга 5 та табиий маҳсулот

Ўзида антисептик хусусиятни мужассамлаштирган табиий маҳсулотлар ҳақида эшитганмисиз? Таркибида танин, гликозид ва фитонцид бўлган маҳсулотлар табиий антисептиклар деб аталади ва улар микроблар кўпайишининг олдини олади, деб ёзади Cosmopolitan.

Руккола

Рукколани йилнинг исталган фаслида топиш мумкин. Бироз аччиқ мазага эга ушбу ўсимлик таркибида микробларни ўлдириш хусусиятига эга эфир мойлари, фитонцид ва гликозидлар бор.

Рукколадан турли салатлар тайёрлашда фойдаланиш мумкин. Уни гўштли ва балиқли таомлар билан ҳам истемол қилса бўлади.

Ананас

Ушбу экзотик мева бир неча витаминларга эга бўлибгина қолмай, микроорганизмлар билан ҳам яхши курашади.

Бундан ташқари, ананасда оқсилларни ҳазм қилишга кўмаклашувчи бромелаин ферменти ҳам мавжуд. Шунинг учун ҳозирги пайтда ананас еб туришнинг кони фойда.

Долчин

Ушбу хуштаъм зиравор таомларга ҳид ва маза берибгина қолмай, антибактериал ва шамоллашга қарши хусусиятга эга.

Долчинни пишириқларга солиш мумкин, қаҳва ва чой билан бирга ичиш мумкин. Дунёда долчиннинг икки тури бор: Цейлон долчини ва кассия.

Цейлон долчини Ҳиндистоннинг жанубий ҳудудлари ва Шри-Ланкада ўсади. Айнан Цейлон долчини энг фойдали ҳисобланади. Кассия эса дорихоналарда сотилади, унинг таркибида турли касалликларни келтириб чиқарувчи кумарин моддаси мавжуд. Шунинг учун кассия долчинини истеъмол қилишда эҳтиёт бўлиш керак.

Лимон

Шамоллаганда уй шароитида даволаниш чоғида лимон бизга ёрдамга келиши бежиз эмас. Лимон таркибида фитонцидлар бўлиб, ушбу модда антисептик хусусиятни таъминлайди.

Бундан ташқари, лимонда C, А, B1, D ва P витаминлари мавжуд.

Лимон қайноқ чойга солинса, у фойдали хусусиятларини йўқотади, шунинг учун лимонли чой тайёрлаш учун чойнинг бироз совишини кутинг.

Пиёз

Таркибидаги фитонцид туфайли пиёз энг кучли антисептиклардан бири ҳисобланади.

Пиёз микроорганизмларни ўлдиради, иммунитетни оширади, қонни тозалайди. Пиёзни салатларга солинг, овқатга ишлатинг. Уни қанча кўп есангиз, шамоллаш ва вируслар сиздан шунча узоқ бўлади.