Бутун дунё бўйлаб янги турдаги коронавирус тарқалгани сабаб миллионлаб одамлар учун шахсий гигиенага риоя қилиш биринчи масалага айланди. Эпидемиологлар вирусга қарши курашишнинг энг яхши йўли — қўлни вақтида ювиш дея таъкидламоқда. Қўлни ювиш бир қарашда жуда оддий ишдек туюлиши мумкин, бироқ аслида ушбу жараённинг муҳим жиҳатлари бор ва уни доим ёдда сақлаш керак. BigPicture қўлни самарали ювишнинг усуллари ҳақида маълумот берди.
Албатта совундан фойдаланиш керакми?
Кун давомида қўлни бир неча марта ювиш организмга турли бактерия ва вируслар тушиши эҳтимолини камайтиради. Теридаги овқат қолдиқлари ва бошқа ифлосланишлар — бу касаллик келтириб чиқарувчи организмларнинг яшаши учун жуда қулай муҳит.Совун тери устида кўпайишга улгурган микроорганизмлар сабаб юзага келган сув-ёғ қатламни ювиб ташлаш имконини беради. Шу сабабли қўлни ювишда имкони борича совундан фойдаланиш тавсия этилади. Бироқ қандайдир сабаб билан совун бўлмаса, шунчаки сув билан ювиш ҳам кифоя қилади.
Шифокорлар, шунингдек, қўлларни махсус воситалар ёрдамида яхшилаб ювиш орасидаги вақтда, совунсиз сув билан вақти-вақти билан ювиб туриш зарар қилмаслигини таъкидлайди.
Бир кунда қўлни неча маротаба ювиш керак?
Қўлларни овқатланишдан олдин ва кейин совунлаб ювиш керак. Шунингдек, бу ишни жамоат жойларига борганда, транспорт воситасидан фойдаланганда, турли жонзотларни ушлаганда, кўчалар бўйлаб сайр қилиб бўлгандан кейин, айниқса, пул санагандан сўнг амалга ошириш керак. Ҳар бир инсон қўлини кунига камида 7 маротаба ювиши керак.
Совун — теридаги ёғларни ювиб, уни қуритадиган кимёвий моддадир. Аммо айнан шу салбий омилларда унинг фойдали хусусиятлари ётади. Микроблар қўлларнинг терисидаги ёғ қатламида яшайди ва кўпаяди. Шу сабаб қўлларни совун билан ювиш орқали улардан вақтинча қутулиш мумкин.
Шуни унутмаслик керакки, терида ёғ безлари жуда тез тикланади, уларда микроорганизмларнинг кўпайиш жараёни дарҳол бошланади. Шунинг учун кун давомида қўлларни ювиш ортиқча бўлиши мумкин эмас — қанчалик кўп бўлса, шунча яхши.
Совун: оддийми ёки антибактериал?
Ҳар қандай совун сув-ёғ қатламини йўқ қилади, аммо антибактериал яна бир қатор афзалликларга эга. Унинг таркибини ташкил этувчи микробларга қарши компонентлар қўлларни ювгандан кейин бир мунча вақт терида қолади ва микробларнинг кўпайишини тўхтатади.
Антибактериал совун нафақат гигиеник функцияни бажаради, балки терини зарарсизлантиради. Афсуски, бу таъсир узоқ вақт давомида сақланиб қолмайди, шунинг учун бундай маҳсулотни ишлатиш қўлни камроқ ювиш ёки уни яхшилаб ювмаслик учун сабаб бўла олмайди.
Мавзуга доир: Коронавирусдан ҳимояланиш бўйича асосий чоралар
Қўл учун крем
Кўпчилик ювинишдан кейин қўлларни махсус крем билан артишга одатланган, бу эса совунни қўллаш натижасида терининг йўқотилган намлигини қайта тиклашга ёрдам беради. Бу қўлни ювишнинг фойдасига зид эмасми, ахир сув орқали табиий ёғ қатлам ювиб ташланиб ва дарҳол сунъий крем суртилмоқда?
Ҳар доим ҳам қўл ювилганидан кейин крем ишлатилмайди. Унинг мақсади терини қуруқликдан ҳимоя қилишдир, бу унинг тўсиқ функциясини камайтиради. Одатда, терининг ўзи намлаши учун керак бўлган миқдордаги кремни ўзлаштиради, аммо ортиқча қолдиқ бўлса, уларни артиб ташлаш керак. Терида қолган крем микробларнинг кўпайиш жойига айланиши мумкин.
Изоҳ (0)