Коронавирус юқтириб олган асли украиналик актриса Ольга Куриленко Instagram’даги саҳифаси орқали мухлисларига мурожаат қилди ва айни пайтда ўзини қандай ҳис этаётгани ҳақида маълумот берди.
https://www.instagram.com/p/B94THD4Je_a/?igshid=1cybqievqn3bg
«Ҳаммага салом! Бугун мен ўзимни анча яхши ҳис этяпман! Иссиғим тушди. Мен ҳозирда Лондондаман. Мен коронавирусни юқтирганимни қаердан билдим? Касалхонада тест топширдим ва у ижобий чиқди. Менга қандай дорилар ёзиб беришди? Ҳеч қандай?
Шифокорлар агар иссиғим кўтарилса ва қаттиқ оғриқ бўлса парацетамол ичишни тайинлади, мен худди шундай қилдим.
Иммунитетимни кўтариш учун айрим витаминларни қўшимча тарзда ичяпман: C, E, D, B5, Куркумин, Цинк.
Диққат! Бу витаминлар коронавирусни даволамайди, улар иммун тизимига вируслар ва инфекцияларга қарши курашишга ёрдам беради. Барча беморларга тезроқ соғайиб кетишни тилаб қоламан!», — деб ёзади актриса.
Аввалроқ актёр Том Хэнкс ва унинг рафиқасида, «Тахтлар ўйини» юлдузи Кристофер Хивьюда, британиялик актёр Идрис Эльба ҳам коронавирусни юқтиргани ҳақида хабар берилган эди.
Эслатиб ўтамиз, бутун дунё бўйлаб коронавирус билан касалланганлар сони 200 минг кишидан, вафот этганлар сони эса 8 мингдан ошган. Касалликни юқтирганларнинг асосий қисмини (80 фоизи) Европа ва Осиё-Тинч океани минтақасида истиқомат қилувчи фуқаролар ташкил этмоқда.
19 март куни Жаҳон соғлиқни сақлаш ташкилоти коронавирусга қарши вакциналарнинг илк синовлари бошланганини маълум қилди. Хитойнинг эпидемия ўчоғи ҳисобланган Хубэй провинциясида вазият тобора яхшиланмоқда. Хусусан Хубэй провинциясида ва Ухань шаҳрида сўнгги бир кун ичида касалик юқтириш бўйича бирорта янги ҳолат аниқланмади.
Ўзбекистонда коронавирусга чалинганлар сони 23 кишига етди.
Изоҳ (0)