Ўзбекистон ташқи ишлар вазирлиги матбуот хизматининг раҳбари ўзгарди. Кўп йиллардан буён ТИВ матбуот хизматига раҳбарлик қилган, 2019 йил кузида расман вазир матбуот котибига айланган Адилбек Каипбергенов ўрнига Авазбек Ҳожиметов тайинланди. Бу ҳақда ТИВ матбуот хизмати хабар берган.
Хабарга кўра, Ташқи ишлар вазирининг маънавий-маърифий ишлар самарадорлигини ошириш, давлат тили тўғрисидаги қонун ҳужжатларига риоя этилишини таъминлаш бўйича маслаҳатчиси ҳам лавозимга тайинланган.
«Ўзбекистон Республикаси Ташқи ишлар вазирлиги ҳайъати йиғилишида Жамоатчилик ва оммавий ахборот воситалари билан алоқалар бошқармаси бошлиғи – матбуот котиби этиб тайинланган Авазбек Ҳожиметов ва Ташқи ишлар вазирининг маънавий-маърифий ишлар самарадорлигини ошириш, давлат тили тўғрисидаги қонун ҳужжатларига риоя этилишини таъминлаш бўйича маслаҳатчиси этиб тайинланган Раҳматулла Назаров таништирилди», — дейилади Ташқи ишлар вазирлиги матбуот хизмати хабарида.
Авазбек Ҳожиметов кўп йиллар давомида Ташқи ишлар вазирлигида ишлаган, 2016 йил августида Ўзбекистоннинг Биринчи Президенти Ислом Каримовга матбуот котиби этиб тайинланган. Кейинроқ президент матбуот хизмати Ахборот-таҳлил ишлари бўйича сектори мудири сифатида ишлаган, 2019 йил мартидан 2019 йил октябрига қадар Президент Администрацияси ҳузуридаги Ахборот ва оммавий коммуникациялар агентлиги директорининг биринчи ўринбосари лавозимида фаолият кўрсатган.
Раҳматулла Назаров эса Ташқи ишлар вазирининг маънавий-маърифий ишлар самарадорлигини ошириш, давлат тили тўғрисидаги қонун ҳужжатларига риоя этилишини таъминлаш бўйича маслаҳатчиси лавозимига тайинлангунига қадар Сенатнинг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси аъзоси бўлган.
Изоҳ (0)