Коронавирус муносабати билан аксарият кишилар уйдан чиқмаслиги ёки масофавий ишлашига тўғри келмоқда. Иш, ўқиш ёки бошқа юмуш баҳона пиёда юриш йў​қ, спорт заллари ёпиқ, музлатгич эса тўлиб-тошган. Бундай вазиятда вазн тўплаш эҳтимоли юқори бўлади. Бироқ шуни унутмаслик керакки, ортиқча ҳаракатсизлик ва оз вақт ичида тез вазн тўплаш қон айланишининг ёмонлашиши, овқат ҳазм қилиш системасида ўзгаришлар бўлишига сабаб бўлади. Шуларни инобатга олган ҳолда,  карантин вақтида «ўзини қўйиб юбормаслик» учун нималар қилиниши кераклиги ҳақида тавсияларни эътиборингизга ҳавола этамиз.

Фото: Getty Images

Тиниқиб ухланг

Унутманг, тиниқиб ухлаш соғлик учун муҳим саналади. Сиз уйда бўлсангиз, демак, сизда бундай имкон бор. Тадқиқотларда аниқланишича, уйқу етишмаслиги очлик ҳиссини қайта-қайта туйишга сабаб бўлади ва сиз айланиб бориб музлатгичга мурожаат қилишингизга тўғри келади. Фақат тиниқиб ухлаш билан кун бўйи ухлашни адаштирманг. Ҳар нарсани меъёри бўлгани яхши. Кунига 6—7 соатдан кам ҳам, кў​п ҳам ухламасликка ҳаракат қилинг.

Нонушта қилишни унутманг

Нонуштани ўзинг қил, тушликни дўстинг билан бўлиш, кечки овқатни душманингга бер, деган гап бор ва бу бежиз эмас. Нонушта сизга кундалик энергия манбайи бўлади, эрталаб фойдали мазали ва тўйимли нонушта истеъмол қилган киши кун бўйи лоҳас бўлмасдан ишларини билиб-билиб битиради. Аксинча бўлса, кун тартиби бузилиб тушликда ортиқча овқатланиш ва ҳазм қилишга қийналиш мумкин. Нонушта учун иложи борича фойдали таом истеъмол қилиш хусусан, омлет, тост, творог ва мевалар ейиш тавсия қилинади. Айтганча, иштаҳангиз яхши бўлиши учун эрта тонгданоқ, кечки овқатни уйқудан 3—4 соат аввал қилишни режалаштиринг.

Кўп сув ичинг

Қорнингиз очгандек туюлаверадими? Бундай вақтда бир стакан сув ичиб кўринг, чунки, чанқоқ очлик ҳиссидек туюлиши мумкин. Айниқса, сал аввал овқатланган бўлсангиз бу аниқ очлик эмас, чанқаш. Уларни адаштирмасдан сув ичиб кўринг, шунда ҳам бўлмаса, сабзавот ёки мевалар истеъмол қилинг.

Уйингизни тартибга келтиринг

Ишончимиз комилки, спорт билан шуғулланишга ҳар-доим ҳам вақт топавермайсиз, қолаверса уй шароитида спорт билан шуғ​улланиш айниқса мушкул масала. Бундай вазиятда уйингизни йиғиштириш энг альтернатив вариант. Бир вақтда икки қуённи урасиз: уйингиз озода бўлади, сиз эса ортиқча ҳаракатсизликдан чалғийсиз.

Овқат орасида тамадди қилманг

Нонушта, тушлик ва кечки овқатгача бўлган вақт оралиғида тамадди қилишни маслаҳат бермаймиз. Унинг ўрнига кўпроқ суюқлик — сув, шарбат, компот ичиш керак.

Зарарли овқат харид қилманг

Конфет, чипс, шоколадлар қолмадими уйда? Дўконга боришга шошилманг, бу сизнинг қоматингиз бузилмаслиги учун яхши имконият. Ширинлик харид қилишга кўп вақт кетмайди, аммо ширинлик оқибатини йўқотиш учун ҳафталар, ҳатто ойлар кетиши мумкин.

Компьютер қаршисида овқатланманг

Уйдан туриб ишлаш вақтни тўғри тақсимланишини, чалғимаслик ва ташкилотчилкни талаб қилишини жуда яхши англаган ҳолда, компьютер қаршисида таом истеъмол қилмасликни тавсия қиламиз. Овқатланиш вақтида хаёл ва диққат таомда эмас, бошқа нарсада бўлса одам нима еганини билмай, керагидан ортиқча истеъмол қилиши, тўйганини ҳис қилмаслиги, бунинг оқибатида эса ортиқча калория тўплаши мумкин.