Туркия ҳукумати коронавирус пандемияси сабабли барча мактабларни 16 мартдан бошлаб 1 ҳафтага ёпишга қарор қилди. Бу ҳақда Туркия президенти бошчилигида ўтказилган янги турдаги коронавирус тарқалишига қарши чора-тадбирлар тўғрисидаги йиғилишда маълум қилинган.
Қайд этилишича, мактаблардаги бир ҳафталик дам олишдан сўнг 23 мартдан бошлаб ўқувчилар онлайн усулда таълим олишга ўтади.
Бундан ташқари, олий таълим муассасалари ҳам икки ҳафтага ёпилиши маълум қилинган. Мамлакатда оммавий тадбирлар ўтказиш ҳам тақиқланди.
Шунингдек, мутахассисларнинг таҳлиллари ва тавсияларига кўра спорт мусобақалари ҳам апрель ойи охиригача томошабинларсиз ўтишини маълум қилган.
Эслатиб ўтамиз, 11 март куни Туркияда коронавирус билан касалланиш бўйича дастлабки ҳолат қайд этилганди. Мамлакат фуқароси Европага борганида коронавирусни юқтириб олган. Ҳукумат туроператорларга коронавирус тарқалиши муносабати билан сайёҳлик мавсумини бошлашга шошилмасликни тавсия қилган.
Аввалроқ коронавирус сабаб Озарбайжон ва Қирғизистонда оммавий тадбирлар бекор қилингани, Қозоғистонда ҳам оммавий тадбирлар ўтказиш тақиқланиб, мактаб ўқувчилари таътилга эртароқ чиқадиган бўлгани, Эммануэль Макрон Франциядаги барча таълим муассасаларини ёпиш бўйича топшириқ бергани хабар берилганди.
UNESCO томонидан эълон қилинган маълумотларга кўра, ҳозирги вақтда коронавирус туфайли кузатилаётган инқироз бутун дунёда 363 миллион ўқувчи ва талабани қамраб олган. Бунда 57,8 миллион нафар талаба, қолгани эса мактаб ёшигача бўлган ҳамда мактаб ўқувчилари таълим олишдан узилиб қолган. Шу тарзда коронавирус сабабли жаҳонда ҳар бешинчи ўқувчи мактабга, ҳар тўртинчи талаба олий ўқув юртига бора олмаяпти.
Изоҳ (0)