Бош прокуратурада 12 март, пайшанба куни Ўзбекистон бош прокурори Ниғматилла Йўлдошев Россия Тергов қўмитаси раиси Александр Бастрикин билан учрашуви бўлиб ўтди.
Бош прокуратуранинг «Дарё»га маълум қилишича, учрашув давомида делегация вакилларига Президент Шавкат Мирзиёев бошчилигида Ўзбекистон ҳаётининг барча жабҳаларида, хусусан, суд-ҳуқуқ соҳасида амалга оширилаётган ислоҳатлар ҳақида маълумот берилди.
Учрашув иштирокчилари Ўзбекистон Бош прокуратураси билан Россия Тергов қўмитаси ўртасидаги ҳамкорлик профессионал алоқаларни йўлга қўйиш ва шартномавий-ҳуқуқий базасини кенгайтириш орқали изчиллик билан ривожланаётганлигини таъкидлади.
Тарафлар ўзаро манфаатли бўлган кенг қамровли масалаларни муҳокама қилди ва идоралараро ҳамкорликни янада ривожлантириш истиқболлари бўйича фикр алмашди.
Учрашув якунида Бош прокуратура билан Россия Тергов қўмитаси ўртасида ҳамкорлик тўғрисидаги битим ҳамда 2020—2021 йилларга мўлжалланган идоралараро ҳамкорлик дастури имзоланди. Ушбу ҳужжатларнинг амалда татбиқ этилиши ҳуқуқий соҳада ахборот ва илғор тажриба алмашиш орқали икки томонлама ҳамкорликнинг ривожланишини янги босқичга кўтаришга хизмат қилиши таъкидланди.
Россия делегациясининг ташрифи шаклланган сермаҳсул алоқаларни янада кенгайтириш ва мустаҳкамлаш йўлида муҳим қадам эканлиги қайд этилди.
Изоҳ (0)