Самарқанд вилоятининг Оқдарё туманидаги фуқаро хонадонида ноқонуний ов қуроли сақланаётгани маълум бўлди. Бу ҳақда «Дарё»га вилоят ИИБ ахборот хизмати хабар бермоқда.
Оқдарё туман ИИБ тезкор ходимлари тумандаги «Учтепа» маҳалласида яшовчи Б.Т.нинг яшаш уйида ноқонуний қурол сақланаётганлигини аниқлаган. Фуқаро Б.Т.нинг уйидан чиққан ноқонуний қурол 1958 йилда ишлаб чиқарилган ИЖ-56-3 русумли ўқотар ов қурол эканлиги аниқланиб, ашёвий далил тариқасида ҳужжатлаштириб олинган.
Самарқанд вилоят ИИБ эксперт криминалистика бўлимининг хулосасига кўра, ушбу қурол отиш учун яроқли эканлиги маълум бўлган.
Мазкур ҳолат юзасидан туман ИИБ ҳузуридаги тергов бўлинмаси томонидан Жиноят кодексининг 248-моддаси (Қурол, ўқ-дорилар, портловчи моддалар ёки портлатиш қурилмаларига қонунга хилоф равишда эгалик қилиш) 1-қисми (Тегишли рухсатномасиз ўқотар қурол, шунингдек, ўқ-дорилар, портловчи моддалар ёки портлатиш қурилмалари тайёрлаш, олиш, олиб юриш, сақлаш, олиб ўтиш ёки жўнатиш) билан жиноят иши қўзғатилиб, тергов ҳаракатлари олиб борилмоқда.
Изоҳ (0)