Бухоролик маст чўпонлар Туркия фуқаросининг автомобилига тош отиб, уни дўппослаган. Бу ҳақда «Дарё»га Жондор тумани ИИБ катта терговчиси, майор Ҳаёт Қаҳҳоров хабар берди.
Ҳаёт Қаҳҳоровнинг маълумот беришича, Туркия Республикасидаги Nedim Lojistik МЧЖ ҳайдовчиси Демир Муса бошқарувида бўлган Mercedes-Benz русумли автомашина халқаро М-37 автомобиль йўли бўйлаб Самарқанд—Туркманистон йўналишида ҳаракатланиб бораётганида Жондор тумани «Қозикенти» маҳалласида яшовчи 32 ёшли чўпон Г.Ҳ. автомашинанинг олд ойнасига тош отган.
Демир Муса машинасини йўлнинг ўнг томонига тўхтатгач, маст чўпон 31 ёшли шериги Ж.Р. билан ҳайдовчини уриб, дўппослаган.
Ҳолат юзасидан зўравон чўпонларга Жиноят кодексининг 277-моддаси 1-қисми «б» ва «д» бандлари (Бир гуруҳ шахслар бўлиб, ёш бола, қария, ногирон ёки ожиз аҳволдаги шахсларга нисбатан безорилик) билан жиноят иши қўзғатилиб, қўлга олинган.
Ҳозирда тергов ҳаракатлари олиб борилмоқда.
Изоҳ (0)