Тошкент шаҳрида 8 март куни тонгда кўп қаватли уйлардан бирининг олдидаги автотураргоҳда қолдирилган BMW X5 ва Mercedes GLC автомобиллари ёниб кетгани ҳақида хабар берилган эди. Тошкент шаҳар ИИББ матбуот хизмати ушбу ҳолат юзасидан маълумот берди.
Қайд этилишича, 8 март куни тахминан соат 05:30 да Миробод тумани Шаҳрисабз кўчасида 36 ёшли Камила И.га тегишли Mercedes-Benz GLС 300 (давлат рақами 01 Y 549 HB) ва BMW X5 (давлат рақами 01 F 701 ХА) автомобилларига қасддан ўт қўйилгани аниқланди.
Зарар миқдори тахминан 225 000 АҚШ долларини ташкил этди. Ҳозирги вақтда тергов олиб борилмоқда, ҳодиса тафсилотлари ўрганилиб, ўт қўйган кишининг шахсини аниқлаш бўйича чоралар кўрилмоқда, жабрланувчи ва гувоҳлар сўроқ қилинмоқда, дейилади хабарда.
Ушбу ҳолат юзасидан Ўзбекистон Республикаси Жиноят кодексининг 173 моддаси иккинчи қисми «в» бандига («Мулкни қасддан нобуд қилиш ёки унга зарар етказиш») мувофиқ жиноий иш қўзғатилди.
Эслатиб ўтамиз, бу каби ҳолатларда қонунчилик томонидан базавий ҳисоблаш миқдорининг етмиш беш бараваридан юз бараваригача миқдорда жарима ёки уч юз соатдан уч юз олтмиш соатгача мажбурий жамоат ишлари ёки икки йилдан уч йилгача ахлоқ тузатиш ишлари ёхуд бир йилдан уч йилгача озодликни чеклаш ёки уч йилгача озодликдан маҳрум қилиш кўринишидаги жазолар белгиланиши кўзда тутилган, дейилади хабарда.
Изоҳ (0)