Коронавирус сабаб Саудия Арабистонидаги спорт тадбирлари томошабинларсиз ўтади

Сауди Газеттеънинг хабар қилишича, Саудия Арабистонидаги барча спорт мусобақалари томошабинларсиз ўтказилади. Шу орқали ҳукумат эпидемиянинг мамлакат бўйлаб тарқалишини олдини олмоқчи.

Таъкидланишича, Саудия Арабистонида вирус билан зарарланганлар сони беш нафарга етган.

Сўнгги маълумотларга кўра, бутун дунё бўйлаб коронавирус билан касалланганлар сони 101 минг кишидан ошиб кетди. Касаллик оқибатида 3,4 минг одам вафот этган, уларнинг 3 мингдан ортиғи Хитой ҳисобига тўғри келмоқда. Дунё бўйлаб коронавирус аниқланган мамлакатлар сони 80 дан ошиб кетди. Жаҳон соғлиқни сақлаш ташкилоти коронавируснинг ёзда бутунлай йўқ бўлиб кетиши ҳақидаги хабарлар ёлғонлигини маълум қилди. 6 март ҳолатига кўра, Ўзбекистонда коронавирус инфекцияси билан касалланиш ҳолати аниқлангани йўқ. Мамлакатнинг у ёки бу жойида у ёки бу одам коронавирус гумони билан касалхонага ётқизилгани ҳақида тарқалган хабарлар Соғлиқни сақлаш вазирлиги томонидан рад этиб келинмоқда.