AliExpress интернет майдони харидорларни COVID-19 коронавирус инфекциясининг тарқалганлиги туфайли буюртмаларни қабул қилиб олишда бир оз кечикишлар бўлиши ҳақида огоҳлантирди. Бу ҳақда «РБК» хабар берган.
«Биз сизнинг буюртмангизни иложи борича тезроқ етказишга ҳаракат қиламиз, аммо коронавирус туфайли кечикишлар кузатилиши мумкин», — дейилади AliExpress’нинг ижтимоий тармоқлардаги саҳифаларида.
Мижозларга йўлланган мурожаатда Жаҳон соғлиқни сақлаш ташкилотининг ушбу жўнатмаларни хавфсиз деб топгани, бироқ баъзан, айрим ҳолатларда буюмларни юбориш кўпроқ вақт талаб қилаётгани қайд этилган. AliExpress мурожааати остидаги роликда посилкаларнинг қандай дезинфекция қилиниши кўрсатилган.
«Сабрингиз учун ташаккур. Биз жўнатмангизни иложи борича тезроқ етказиб беришга ҳаракат қиламиз», — дейилади AliExpress мурожаатида.
ЖССТнинг COVID-19 коронавируси ҳақидаги эслатмасида касаллик тарқалган ҳудудлардаги почта жўнатмаларининг хавфсиз экани ва коронавируснинг бир неча соат ёки кунлар давомида очиқ ҳавода яшай олмасли қайд этилган.
«Инфекциянинг буюртма қилинган товарларнинг етказиб берилиш жараёнида COVID-19 коронавирусининг одамга юқишининг эҳтимоли жуда кам, сабаби жўнатма манзилга етиб келгунига қадар турли об-ҳаво ҳамда ҳарорат шароитларида қолади», — дейилган ЖССТ баёнотида.
COVID-19 коронавируси Хитойда 2019 йилнинг охирида тарқала бошлаган. 3 март ҳолатига касалликка чалинганлар сони 90 минг нафар одамдан ошган, 3124 нафар одам вафот этган. Қурбонларнинг 2946 нафари Хитой фуқаролари.
Изоҳ (0)