Хитойда коронавирусдан даволанган беморлар сони 41 минг кишидан ошди, вафот этганлар эса 2,9 минг кишига яқинлашди

Хитой Соғлиқни сақлаш миллий комиссияси сўнгги бир сутка ичида Хитойда 35 киши коронавирус оқибатида вафот этгани ҳақида хабар берди. Шундай қилиб коронавирус оқибатида вафот этганларнинг жами сони 2870 кишига етди.

Маълум қилинишича, вафот этганларнинг 34 нафари Хубэй провинциясидан, яна бир ҳолат эса Хенан провинциясида қайд этилган. Мамлакатда вирусни юқтириб олганлар сони 79 824 минг кишидан ошган, 41 825 нафар бемор эса даволанишга муваффақ бўлган.

Ҳукумат Хитойнинг материк қисмидан ташқаридаги ҳудудларида 144 касалланиш: Гонконгда — 95 ҳолат (2 нафар бемор вафот этган), Макаода — 10 та ҳолат, Тайванда — 39 ҳолат (бир нафар бемор вафот этган) ҳолати қайд қилинганини маълум қилган.

South China Morning Post хабар беришича, дунё бўйлаб коронавирус билан касалланиш 85 956 ҳолат қайд этилган. Хитойдан кейин инфекциянинг иккинчи йирик ўчоғи Жанубий Корея ҳисобланмоқда. У ерда 3150 нафар одам касалланган. Италияда 1128 ҳолат (29 нафар бемор вафот этган), Эронда 593 (43 нафар бемор вафот этган) қайд қилинган.

Аввалроқ. Тошкентга Жанубий Кореядаги бир гуруҳ ўзбекистонлик эвакуация қилингани, ҳамда Uzbekistan Airways коронавирус сабаб Токио ва Рим шаҳарларига парвозларни тўхтатилгани ҳақида хабар берилганди.