АҚШ президенти Дональд Трамп «Толибон» жангарилари билан битим имзолаш арафасида Америка қўшинларини Афғонистондан олиб чиқиш ниятини яна бир бор маълум қилди. «ТАСС»нинг хабар беришича, ҳужжат 29 февраль куни Доҳада имзоланади.
«Агар ‘Толибон’ жангарилари ва Афғонистон ҳукумати ўз мажбуриятларини бажарса, бизда Афғонистондаги урушни тугатиш ва қўшинларимизни уйга қайтариш учун тўғридан-тўғри йўл пайдо бўлади. Ушбу мажбуриятлар ‘Ал-Қоида’, ИШИД ва АҚШга зарар етказишга уринувчи бошқа барча террорчилк ташкилотларидан холи бўлган янги Афғонистонда мустаҳкам тинчлик ўрнатиш йўлида муҳим қадамдир. Охир-оқибат бундан буён қандай яшашни Афғонистон халқининг ўзи ҳал қилиши керак. Шу сабабли биз тинчлик ўрнатиш ва ўз мамлакати учун янги келажак қуришда афғон халқини ушбу фурсатдан фойдаланиб қолишга чақирамиз», — дейилади Оқ уй томонидан тарқатилган Дональд Трамп баёнотида.
Шунингдек, Трамп президентликка даъвогарлик қилган вақтида Америка халқига қўшинларини уйга қайтаришга ва бу урушга чек қўйишга ваъда берганини, буни амалга оширишда катта ютуқларга эришилаётганини таъкидлаган.
Аввалроқ Дональд Трамп «Толибон» жангарилари билан келишув имзолашга тайёрлигини билдиргани, унда Помпео ҳам иштирок этиши ҳақида хабар берилган эди.
Изоҳ (0)