Ўзбекистонликларни 24 млрд сўмга чув туширган бандлик агентлиги жиноий иши бўйича тергов тафсилотлари маълум бўлди

22 февраль, шанба куни, Ўзбекистон Республикаси ИИВ Интерпол бюроси анжуманлар залида Korean and migrations хусусий бандлик агентлиги МЧЖ мансабдор шахсларига нисбатан қўзғатилиб, дастлабки тергов ҳаракатлари давом этаётган жиноят иши бўйича матбуот анжумани бўлиб ўтди. Унда Korean and migrations хусусий бандлик агентлиги МЧЖ содир этган жиноят иши юзасидан олиб борилган тергов тафсилотлари маълум қилинди.

Вазирлик ҳузуридаги Тергов департаменти раҳбарияти ва масъул ходимлари, шунингдек, ОАВ вакиллари иштирок этган матбуот анжуманида Отақулов Қаҳрамон, Қобилов Одил, Турдиев Хушвақт, Алиқулов Мусулмон, Халмонов Ўрол, Корея Республикаси фуқароси Канг Намкю ва бошқалар жиноий тил бириктириб, Korean and migrations хусусий бандлик агентлиги МЧЖни ташкил этгани, 2019 йил 4 январь куни Ташқи Меҳнат миграцияси агентлигидан Ўзбекистон Республикаси фуқароларини хорижда ишга жойлаштиришга кўмаклашиш билан шуғулланишга лицензия олиб, жамиятга мурожаат қилган фуқароларни 3 ой ичида Жанубий Корея давлатига ишга юборишни ваъда қилиб, улар билан сохта шартнома тузиб, тўлов квитанцияларини сохталаштиргани, жами 2 385 нафар жабрланувчининг 24,8 миллиард сўм пулларини АТБ «Туронбанк» Чилонзор филиалидаги ҳисоб рақамига тўлов қилдириб ҳамда ўзларига нақд кўринишда қабул қилиб, фуқароларнинг жуда кўп миқдордаги пул маблағларини фирибгарлик йўли билан қўлга киритган ҳолда шахсий эҳтиёжларига сарфлаб юборгани эълон қилинди.

Жабрланувчиларга етказилган умумий зарарнинг ундирилган қисми 14,213 миллиард сўм (пул шаклида — 7,6 миллиард сўм, хатланган мол-мулклар — 645 миллион сўм), шунингдек, 3,108 миллиард сўмлик мол-мулкларни хатлаб олиш чоралари кўрилмоқда, жиноят иши қўзғатилишидан аввал жабрланувчиларга қайтарилган маблағ 2,86 миллиард сўмни ташкил этган.

Айбланувчилар томонидан жабрланувчиларга етказилган зарарларни ундириш масаласи суднинг ҳукмидан сўнг ҳал этилади. Иш бўйича айбланувчилар Қ.Отақулов, О.Қобилов, Х.Турдиев, М.Алиқулов, А.Шамшиддинов, О.Жўраев ва Канг Намкюлар қамоқда сақланмоқда, Ў.Халмоновга қидирув эълон қилинган.

Жиноят иши бўйича хатланган мол-мулклар Korean and migrations хусусий бандлик агентлиги МЧЖга тегишли Malibu, (нархи 271,0 миллион сўм), Korean and migrations хусусий бандлик агентлиги МЧЖ биносидаги 150 миллион сўм қйматдаги мол-мулклар, Korean and migrations хусусий бандлик агентлиги МЧЖ Наманган филиали биносидаги 71 миллион сўмлик мол-мулклар ва Наманган вилояти Уйчи туманида жойлашган дала ҳовли (153,0 миллион сўм) жами 645 миллион сўмлик мол-мулклар хатланган.

Шунингдек, айбланувчи Қ.Отақулов раҳбарлик қилган «Фаёз-ХДС» МЧЖга тегишли, нархи 280,0 миллион сўмлик Malibu (қидирувда), айбланувчи Х.Турдиев томонидан жамиятнинг 270,0 миллион сўм пул маблағлари ҳисобига сотиб олинган Malibu (қидирувда), Қ.Отақулов сотиб олган нархи 50,0 миллион сўмлик Forza (қидирувда), жамият ходимлари Ў.Халмоновга ажратилган 433,0 миллион сўм, Ф.Машуровга ажратилган 210,0 миллион сўм, О.Қобиловга ажратилган 205,0 миллион сўм, А.Ҳасановга ажратилган 50,0 миллион сўм, жами 508,0 миллион сўм молиявий қарзлар, Тошкент вилояти Оққўрғон тумани С.Айний кўчасида жойлашган, қуруқ меваларни қадоқлаш заводига сарфланган 2,0 миллиард сўмга яқин пуллар, яъни жами 3,108 миллиард сўмлик мол-мулкларни хатлаб олиш чоралари кўрилмоқда.

Иш бўйича жабрланувчилар томонидан топширилган пул маблағларини қаерга сарфланганлигини аниқлаш мақсадида Korean and migrations хусусий бандлик агентлиги МЧЖ, «Фаёз ХДС» МЧЖ, Vega best МЧЖ ва Enormous wave global МЧЖнинг молиявий фаолиятини, банкдаги ҳисоб рақамидаги пул маблағлари кирим-чиқимининг қонунийлигини текшириш учун ҳужжатли тафтиш ўтказилди.

Фирибгарлар Наманган вилоятида 720 нафар одамнинг қарийб 10 миллиард сўм маблағини ўзлаштирган, уларга 1,8 миллиард сўм маблағ қайтарилган. Шунингдек, Қашқадарё (643 нафар одамнинг 7,3 миллиард сўм маблағи) ва Самарқанд (250 нафар фуқародан 1,6 миллиард сўм) вилоятларидаги фуқаролар ҳам катта миқдорда молиявий зарар кўрган.

Аввал 2019 йил октябрь ойида Бандлик ва меҳнат муносабатлари вазирлиги Korean and migrations хусусий бандлик агентлиги МЧЖга берилган Ўзбекистон фуқароларини хорижда ишга жойлаштириш фаолияти билан шуғулланишга рухсат этувчи 0010-сонли лицензия тўхтатилгани ҳамда шу йили ноябрда Ўзбекистонда фирибгарликда гумонланаётган Жанубий Корея фуқаросига жиноят иши қўзғатилгани ҳақида хабарлар берилганди.