Андижон вилояти Избоскан туманида бирон жойда ишламайдиган, ичкиликка ружу қўйган фуқаро К. маст ҳолда ногирон отаси ва онаси билан жанжаллашиб, уларни шафқатсизларча ўлдирган. Самарқанд шаҳрида эса фуқаро Ю. отаси маст ҳолда набирасини сўкканлиги учун у билан жанжаллашган ва пичоқлаб ўлдирган. Бу ҳақда Бош прокуратурада бўлиб ўтган жиноятчиликка қарши курашиш бўйича мувофиқлаштирувчи кенгашнинг кенгайтирилган йиғилишида маълум қилинди.
Бош прокурор Ниғматилла Йўлдошев қотиллик жиноятлари аксарият ҳолларда оила-турмуш ва оддий маиший муносабатлар туфайли келиб чиқаётганини таъкидлаб, бундай тоифадаги жиноятларнинг 28 фоизи эр-хотин, ака-ука, ота-ўғиллар ўртасида юз берганини қайд қилди. Бунга қариндош-уруғлар ёки қўни-қўшнилар ўртасидаги низо ва келишмовчиликлар тўлиқ бартараф этилмагани, оилаларда ижтимоий-маънавий муҳитни соғломлаштиришдаги камчиликлар ҳам сабаб бўлмоқда.
Видеоселектор тарзида ўтказилган йиғилишда мамлакатда ҳуқуқбузарликлар профилактикаси ва жиноятчиликка қарши кураш, бу борада ҳуқуқни муҳофаза қилувчи органлар ва жамоат ташкилотларининг ўзаро ҳамкорлигига доир масалалар муҳокама қилинар экан, 2019 йилда жиноятлар сони Бухоро, Сирдарё, Навоий, Тошкент вилоятлари ва Тошкент шаҳрида юқорилигича қолгани маълум қилинди.
Қотиллик жинояти Тошкент, Наманган ва Сурхондарё вилоятларида кўпайган. Профилактик тадбирлар етарли даражада олиб борилмаганлиги оқибатида 51 та туман ва шаҳарларда қотиллик жинояти кўпайган. Оғир шикаст етказиш Қашқадарёда, номусга тегиш Андижон, Бухоро, Жиззах, Навоий ва Қашқадарёда, босқинчилик Сирдарё, Навоий ва Қашқадарё вилоятларида сезиларли ошган.
Изоҳ (0)