Японияда карантинда турган Diamond Princess саёҳат кемасидан эвакуация қилинган икки нафар Австралия фуқаросида коронавирус аниқланди. Бу ҳақда Австралия ҳукуматига таяниб, АBC хабар берди.
Фото: Reuters
Касалликни юқтириб олганларнинг бири мамлакат жанубида яшовчи 24 ёшли қиз. Австралияга учишидан олдин унда коронавирус аниқланмаган, бироқ у гриппга ўхшаш аломатлардан шикоят қилган. Самолёт қўниши билан у Дарвин аэропортида карантинга жойлаштирилган. Сўнгги тестлар унда COVID-2019 коронавирус борлигини кўрсатган.
Ҳозирда ушбу қиз Аделаидадаги Қироллик шифохонасига жойлаштирилган.
Австралия бош санитар шифокори Брендан Мерфининг сўзларига кўра, касалликка чалинган иккала беморнинг аҳволи ҳозирда барқарор. Улар ўзлари туғилган штатларга махсус ўргатилган персонал ҳамроҳлигида юборилади.
Говард-Спрингс тиббиёт марказида саёҳат кемасидан эвакуация қилинган 164 нафар австралиялик карантинда сақланмоқда. Улар икки ҳафта давомида назорат остида бўлади.
Мавзуга доир: Diamond Princess кемасидаги икки киши коронавирус оқибатида вафот этгани маълум қилинди
Diamond Princess саёҳат кемаси жорий йилнинг 20 январь куни Йокогамадан чиқиб, Кагосима—Гонконг—Окинава йўналишидан ўтиб, 3 февраль куни қайтиб келган. Бу вақтга келиб кемадаги бир неча киши тоби қочгани ҳақида хабар қилган ва ҳукумат бортдаги барчани текширувдан ўтказишга қарор қилган. 11 февраль куни саёҳат кемасидаги кексалар ва сурункали касалликларга эга беморларни соҳилга эвакуация қилиш бошланган эди.
