Сурхондарё вилоятининг Олтинсой тумани «Халқобод» маҳалласида 14 февраль куни аҳоли ва ҳокимият вакиллари ўртасида тўқнашув юз берди. Ушбу ҳолат юзасидан ИИВ ва Бош прокуратура баёнот берди.

Расмий баёнотларга кўра, олти фуқаро «Оқ-олтин манзараси» фермер хўжалигига қарашли пахта ва ғаллага мўлжалланган экин ер майдонининг 0,39 гектар қисмига яшаш имконияти мавжуд бўлмаган уй-жой қуриб олган. Ушбу уй-жой эгаларига дастлаб 8 февраль куни бу иншоотларни фуқаролар ўз ҳисобидан бузиб ташлаб, экин майдонини бўшатишлари, фуқароларга бошқа жойдан ер берилиши айтиб, тушунтирилган. Бош прокуратура ахборотига кўра, фуқаролар икки кун муҳлат сўраган.

Мутасаддилар 14 февраль куни муаммоли жойга қайтиб келганида, уй-жойларнинг учтасига аҳоли кўчиб кириб олгани маълум бўлган; Бош прокуратуранинг ёзишича, фуқаролар ва уларнинг қариндошлари қўлларида бензин, таёқ, белкурак, тош ва бошқа нарсалар билан қуролланган ҳолда ишчи гуруҳ олдига чиққан; жараёнда икки нафар ИИБ ходими ва бир фуқаро тан жароҳати олган.

Расмийларнинг баёнотлари ортидан журналист ва блогер Қобил Хидировнинг Telegram‘даги @davletovuz каналида муносабат эълон қилинди. Унда, жумладан, расмий ахборотлардан «яна одамларимизни айбдор қилиш оҳанги» сезилаётгани алоҳида кўрсатиб ўтилган. Блогер муносабати билан қуйида тўлиқ танишиш мумкин.

Шунақа баёнотларни ўқиб, ҳар доимгидек яна одамларимизни айбдор қилиш оҳангини сезиш мумкин.

Бу гал фуқаролар оддий давлат ходимларига эмас, туман ҳокими, прокурори, туман ички ишлар бўлими бошлиғи сингари амалдордан иборат ишчи гуруҳ талабига кўнмаяпти — казо-казо амалдорлар оддий одамлар билан мулоқот қила олмаяпти, унинг муаммосига жўяли ечим топиб бера олмаган. Баёнотда айтилганидек, фуқароларга «тушунтирилган», холос.

Одам учун уйдан азиз, муқаддас нарса йўқ. Уй барча мулклардан муқаддас. Бу уй қонуний ёки ноқонуний қурилгани эллигинчи масала. Туман ҳокими, прокурори, ИИБ бошлиғининг хатти-ҳаракати балки қонунийдир, аммо ўша ердаги одамлар учун адолатсиз бўлгани аниқ.

Бу ерда прокуратура қонуннинг ортига яшириниб, ўзининг, бошқа майда амалдорларнинг ҳаракатларини оқлаб, одамларни айбдор қилишга уринар экан, ўтган йилги «снос»лар билан боғлиқ воқеалар такрорланмаслигига ким кафолат беради? Прокуратура ходими иштирок этган, воқеа ривожидан манфаатдор бўлган идорани ўзини ўзи нечоғли холис текшира олади?

Давлатнинг энг катта бойлиги бу — халқ. Ер халқдан азиз бўлибдими? Кўз ўнгимизда монопол тадбиркорларимизга барча ресурсларимиз беминнат тақдим этилаётган, бир божхона пости бошлиғи уйидан 400 минг доллар чиқаётган, шундоқ ҳам рентабелли йирик корхоналаримиз ўзимизнинг «қоракўз инвесторлар»га нол қийматда берилаётган бир пайтда, ҳокимиятнинг кучи яна ўша ҳимоясиз, алданган фуқароларга етаяпти, холос.

Бу жараёнлар одамда хавотир уйғотаяпти. Эртага қаерда хато қилган эдик, демасдан, ҳозир кўзни очиш керак.

Буларнинг барчаси ИМҲО, албатта.

@davletovuz